काँग्रेसवर काय वेळ आली! गर्दी जमवण्यासाठी महिलांना दिले १०० रुपयांचे कुपन

नागपूर : नागपुरात भाजप नगरसेवक सतीश होले (Satish Hole) यांनी मंगळवारी (ता. २२) काँग्रेस (Congress) प्रदेशाध्यक्ष नाना पटोले (nana patole) यांच्या उपस्थितीत काँग्रेस पक्षात प्रवेश केला. कार्यक्रमाला परिसरातील नागरिक आणि महिला मोठ्या संख्येने उपस्थित होत्या. कार्यक्रम संपल्यावरही उपस्थित महिला जाण्याचे नाव घेत नव्हत्या. एका महिलेला विचारल्यावर आयोजकांनी कार्यक्रमात गर्दी करण्यासाठी शंभर रुपये देणार असल्याचे सांगितले. मात्र, पैसे अद्याप न मिळाल्याने आम्ही थांबल्याचे सांगितले.

याचे फुटेज घेत असताना कार्यकर्त्यांनी माध्यमांच्या प्रतिनिधींना हटकले. याबाबत विचारले असता ‘आम्ही नाश्त्याचे कुपन’ देत असल्याचे कार्यकर्त्यांनी सांगितले. मात्र, महिलेने हे कुपन शंभर रुपयांचे असून, पदाधिकाऱ्याच्या घरी जाऊन घ्यायचे आहेत, असे सांगितले. मूळचे काँग्रेसचे (Congress) असलेले नगरसेवक सतीश होले (Satish Hole) यांनी महापालिकेच्या निवडणुकीत भाजपमध्ये प्रवेश केला होता. विधानसभेच्या निवडणुकीत त्यांनी बंडखोरी केली होती. त्यानंतर भाजपने त्यांना निलंबित केले होते.