नागपूर : सहा हजार आठशेवर विद्यार्थ्यांचे लसीकरण

नागपूर : दहावी व बारावीच्या विद्यार्थ्यांच्या लसीकरणाला (Vaccination) पहिल्याच दिवशी उत्स्फूर्त प्रतिसाद मिळाला. सहा हजार ८३८ विद्यार्थ्यांनी आज कोवॅक्सिनचा (Covaxin vaccine) पहिला डोस घेतला. विद्यार्थ्यांच्या लसीकरणाचा वेग वाढविण्यासाठी आणखी पाच केंद्रांची भर टाकण्यात आली. त्यामुळे उद्यापासून १९ केंद्रांसह शाळा, महाविद्यालयांमध्ये लसीकरणाची सोय उपलब्ध होणार आहे.

केंद्र सरकारच्या निर्देशानुसार आज शहरात दहावी ते बारावीतील १५ ते १८ वर्षे वयोगटातील विद्यार्थ्यांसाठी लसीकरणाला सुरुवात झाली. महापौर दयाशंकर तिवारी यांच्या उपस्थितीत बजेरिया येथील राजकुमार गुप्ता समाजभवनातून लसीकरणाला प्रारंभ झाला. सकाळी दहा वाजतापासून लसीकरण करण्यात आले.

लसीकरण केंद्रांवरील सकाळी गर्दी झाली. त्यामुळे विद्यार्थीही लसीकरणासाठी उत्सुक असल्याचे दिसून आले. अनेक विद्यार्थी पालकांसह केंद्रावर आले. शाळांमध्ये विद्यार्थ्यांनी लस घेतली. महापालिकेने आज १४ केंद्रांची सोय उपलब्ध करून दिली होती तसेच ३३ शाळा, महाविद्यालयांनीही सुविधा उपलब्ध करून दिली. महापालिकेचे केंद्र व शाळा, महाविद्यालयात आज पहिल्याच दिवशी सहा हजार ८३८ विद्यार्थ्यांनी लस घेतली. शहरात लसीकरणासाठी पात्र १ लाख ३० विद्यार्थी आहेत.

७० विद्यार्थ्यांना पाठवले परत

सर्दी, खोकला असल्याने जवळपास ७० विद्यार्थ्यांना आज पहिला डोस घेणे शक्य झाले नाही. मेडिकल येथील केंद्रावरून सात विद्यार्थ्यांना परत पाठविण्यात आले. १४ केंद्रांवर जवळपास ७० विद्यार्थी आज लस घेऊ शकले नाही.

१० जानेवारीपासून बूस्टर डोस

१० जानेवारीपासून ६० वर्षांवरील ज्येष्ठ नागरिक तसेच फ्रंटलाईन वर्कर, डॉक्टर, नर्स आदींना बुस्टर डोस देण्यात येणार आहे. परंतु दुसऱ्या डोसनंतर नऊ महिने पूर्ण झालेल्यांनाच बुस्टर डोस देण्यात येईल. त्यामुळे अनेकांना बूस्टर डोससाठी प्रतीक्षा करावी लागणार आहे.