Indurikar Maharaj : 'तीनं' हृदय तोडलं म्हणून प्रेयसीसाठी जीव देऊ नका; असं का म्हणाले इंदुरीकर महाराज?

नागपूर : तीनं माझं हृदय तोडलं म्हणून आयुष्य संपविणाऱ्यांची संख्या कमी नाहीय. अशांचा आपल्या खास शैलीत इंदुरीकर महाराजांनी चांगलाच समाचार घेत आपला जीव मोलाचा असल्याचं सांगितलं. देश, राष्ट्रासाठी ज्यांनी बलिदान दिलं ते खरं प्रेम आहे, असंही इंदुरीकर महाराज (Indurikar Maharaj) म्हणाले.

श्री साई पालखी परिवार विदर्भ आणि साई भक्त साई सेवक परिवारच्या वतीनं 'नाचू कीर्तनाचे रंगी' हा इंदोरीकर महाराज यांचा कीर्तन सोहळा आयोजित करण्यात आला होता. महाल येथील चिटणवीस पार्क इथं झालेल्या या कीर्तन सोहळ्याला मोठ्या संख्येनं नागपूरकर (Nagpur) उपस्थित होते. श्री सदगुरू साई चॅरिटेबल ट्रस्टच्या वतीनं 9 मार्च 2023 मध्ये नागपूर ते शिर्डी पायी पालखी पदयात्रा काढण्यात येणार असल्याचं यावेळी जाहीर करण्यात आलं.

इंदुरीकर महाराज म्हणाले, आपण सगळे एकाच देवाची लेकरं आहोत, सर्वांचं रक्त लाल आहे, पेशी, मेंदू प्रत्येकाला दिला आहे. मनुष्याला तो देव आहे याचं ज्ञान नाही. देव पाहायचा नाही तर देव बनायचं आहे. ज्ञान आलं तर देव बनाल असं जीवनतत्त्वज्ञान सांगत असताना इंदुरीकर महाराजांनी महाराष्ट्रात खरं बोलणाऱ्यांचं काय हाल होतात याचं वास्तव मांडलं.

महाराष्ट्रात खरं कोणी बोलायचं नाही, जो बोलेल त्याचा गेम होतो. असा संदेश आपल्या खास विनोदी शैलीनं दिला. आजच्या जीवनपद्धतीवर भाष्य करत त्यांनी आपल्या कीर्तनातून सर्वांना हसविलं. पैसा, सत्ता, संपत्ती आपल्या कामी येत नाही. दहा मिनिटांत आजीचा माजी होतो हे कळतही नाही. त्यामुळं ताकद, पैसा आणि सत्तेचा योग्य वापर करा. चांगलं वागणं कधीच वाया जात नाही. झाडांना पाणी द्या, शक्य तेवढ्या लोकांना मदत करा, असा सल्लाही इंदुरीकर महाराजांनी दिला.