‘सायंकाळी किराणा आणूया, सवारी वाहून येतो’ असं म्हणत पडले घराबाहेर अन्...

नागपूर : इ-रिक्षा (E-rickshaw) घेऊन सवारी मिळविण्यासाठी चालक घराबाहेर पडला. मात्र, नियतीला त्याच्या पोटाचे खळगे भरणे मान्य नव्हते. बैद्यनाथ चौकातून जात असताना भरधाव इनोव्हा कारने रिक्षाला धडक दिली (The car hit). या धडकेत रिक्षाचालक जागीच ठार झाला. ही दुर्दैवी घटना बुधवारी सकाळी बैद्यनाथ चौकाजवळ घडली. वामन झोडापे (५९, रा चचखेडे ले-आऊट, मंगळवारी) असे अपघातात ठार झालेल्या रिक्षाचालकाचे नाव आहे. (E-rickshaw driver killed in Innova car crash Nagpur crime news)

पोलिसांनी दिलेल्या माहितीनुसार, वामन झोडापे यांना पत्नी, दोन मुले आणि एक मुलगी आहे. संसाराचा गाडा हाकण्यासाठी वामन यांनी ई-रिक्षा घेतला होता. सवारी मिळवून कुटुंबाचा उदरनिर्वाह ते करीत होते. लॉकडाउन असल्याने लोक अत्यावश्यक कामासाठीच घराबाहेर पडतात. त्यामुळे रिक्षाचालकांची कमाई तुटपुंजी आहे. त्यामुळे कोरोनाची भीती वेशीला टांगून तीन मुलांच्या भविष्यासाठी आणि दोन वेळेसच्या जेवणाची व्यवस्था करण्यासाठी वामन रोज सकाळीच रस्त्यावर सवारीच्या शोधात निघायचे.

बुधवारी सकाळी ते बैद्यनाथ चौकाजवळ थांबले. सवारीची वाट पाहत असतानाच अचानक मध्यप्रदेशात नोंदणीकृत इनोव्हा कार भरधाव आली. बैद्यनाथ चौकाकडून ओव्हरटेक करीत अशोक चौकाकडे जात असताना कारचालक आनंद अरखेल (३३, रा. न्यु सुभेदार) याने थेट ई-रिक्षावर कार घातली. अपघात एवढा भयंकर होता की रिक्षाचा चुराडा झाला तर कारने दुभाजकाला धडकून २० फूट फेकली गेली. या अपघातात झोडापे यांचा जागीच मृत्यू झाला. या प्रकरणी पोलिसांनी गुन्हा दाखल करून कार चालक अरखेलला ताब्यात घेतले. त्याच्या विरुद्ध गुन्हा दाखल केला.

घरी किराणाऐवजी आला निरोप

घरातील किराणा संपला होता. त्यामुळे ‘सायंकाळी किराणा आणूया, मी सवारी वाहून येतो.’ अशा निरोप देऊन ते रिक्षा घेऊन घराबाहेर पडले. मात्र, काही तासांतच किराणा ऐवजी वामन झोडापे अपघातात मृत पावल्याचा निरोप आला. पोलिसांनी झोडापे यांच्याकडे मिळालेल्या कागदपत्रांवरून ओळख पटविली आणि कुटुंबीयांना अपघाताबाबत निरोप दिला.

(E-rickshaw driver killed in Innova car crash Nagpur crime news)