नागपूरमधून दारूगोळ्याची रसद; पहिली खेप लष्कराकडे

नागपूर : नागपूरच्या ‘इकॉनॉमिक एक्सप्लोझिव्ह लिमिटेड’ या खासगी कंपनीने तयार केलेल्या पूर्णपणे स्वदेशी बनावटीच्या हातबॉम्बची पहिली खेप संरक्षणमंत्री राजनाथ सिंह यांच्या उपस्थितीत भारतीय लष्कराकडे सोपवण्यात आली. संरक्षण सामग्री उत्पादन क्षेत्रातील हा एक महत्त्वाचा टप्पा आहे. ‘आत्मनिर्भर भारत’च्या दिशेने एक मोठे पाऊल असल्याचे संरक्षण मंत्री म्हणाले.

दोन वर्षांत संरक्षणविषयक निर्यातीने १७ हजार कोटी रुपयांचा टप्पा ओलांडला आहे. भारतात खासगी उद्योगाने प्रथमच संरक्षण दलासाठी दारूगोळा तयार केला आहे. ‘सोलर इंडस्ट्रीज इंडिया लिमिटेड’ची मालकीची उपकंपनी ‘इकॉनॉमिक्स एक्सप्लोझिव्ह लिमिटेड’ या (ईईएल) कंपनीने मागील महिन्यापासून सशस्त्र दलांना आधुनिक हँडग्रेनेड पुरवायला सुरुवात केली आहे.

यावेळी ईईएलचे अध्यक्ष एस. एन नुवाल, लष्करप्रमुख जनरल एम. एम. नरवणे, डीआरडीओचे अध्यक्ष डॉ. जी. सतीश रेड्डी, इन्फन्ट्रीचे अध्यक्ष व महासंचालक लेफ्टनंट जनरल ए. के. सामंत्र उपस्थित होते. लवकरच भारत केवळ देशांतर्गत वापरासाठीच नव्हे तर जगासाठी संरक्षण उत्पादनांची निर्मिती करेल. हे नवीन ग्रेनेड्स आतापर्यंत सेवेत असलेल्या पहिल्या महायुद्धाच्या विंटेज डिझाइनच्या ग्रेनेड क्रमांक ३६ ची जागा घेतील, असे राजनाथसिंह म्हणाले.

उच्च दर्जाची गुणवत्ता

नागपूरमध्ये तयार झालेले हँडग्रेनेड्‍स उच्च दर्जाचे आहेत. सर्वच ऋतूत आणि प्रदेशात त्याची उपयोगिता आहे. पायदळ आणि डीजीक्यूएद्वारे सर्व मापदंडांवर मैदानी प्रदेश, वाळवंट आणि मोठ्या उंचीवरील प्रदेशात उत्पादनांची चाचणी घेण्यात आली आहे. या हँडग्रेनेड्‍सनी ९९.८ टक्के गुणवत्ता सिद्ध केल्याचे राजनाथसिंग यांनी सांगितले.