मुख्यमंत्री समर्थकांना आशेचा ‘किरण’

नागपूर : महाविकास आघाडी सरकारने दिलेली विधान परिषदेवर नियुक्त करावयाच्या आमदारांची यादी परत पाठविल्याने विदर्भातील भाजपमधील इच्छुक तसेच मुख्यमंत्री शिंदे समर्थकांमध्ये आशेचा ‘किरण’ निर्माण झाला आहे.

राज्यपालांना एकूण १२ सदस्यांची विधान परिषदेवर नियुक्ती करायची आहे. महाविकास आघाडी सरकारने दिलेल्या नावांच्या यादीला राज्यपालांनी सरकार असेपर्यंत परवानगी दिली नव्हती. आता सत्ताबदल झाला आहे. मुख्यमंत्री एकनाथ शिंदे आणि भाजपची सत्ता राज्यात आली आहे. आघाडी सरकारने दिलेली उमेदवारांची यादी रद्द करावी, अशी विनंती मुख्यमंत्र्यांनी केली होती. राज्यपालांनी ती लगचे मान्य केली. यादी रद्द केल्याचे जाहीरसुद्धा केले. त्यामुळे आता शिंदे सेना आणि भाजपमार्फत नवीन यादी पाठवण्यात येणार आहे.

ठरलेल्या सूत्रानुसार शिंदे सेना यांना चार तर भाजपला आठ जागा मिळणार आहेत. शिंदे यांच्यासोबत शिवसेनेचे अनेक बेडे नेते व माजी आमदार सोबत आले आहेत. त्यांना सामावून घेण्याची कसरत शिंदे यांना करावी लागणार आहे.

जागा कमी, इच्छुकांची भरमार

भाजपकडे जागा कमी आणि इच्छुक उमेदवारांची संख्याही मोठी आहे. विधान परिषदेवर मुंबई आणि पश्चिम महाराष्ट्रावर जास्त फोकस रहाणार असल्याचे भाजपच्या नेत्यांचे म्हणणे आहे. असे असले तरी उपमुख्यमंत्री देवेंद्र फडणवीस यांचा शब्द अंतिम राहील. हे बघता विदर्भातील त्यांच्या काही कट्टर समर्थकांची वर्णी लागू शकते. त्यामुळे काही इच्छूक आगामी नागपूर महापालिकेची निवडणूक लढवायची की नाही अशा संभ्रमात पडले आहेत.