नागपूर : मातृवंदना योजना ठरतेय महिलांसाठी वरदान

नागपूर : माता व बालकांचे आरोग्य सुधारण्याच्या दृष्टीने गर्भवती व स्तनदा मातेला सकस आहार घेण्यास प्रोत्साहित करून जन्माला येणाऱ्या नवजात बालकांचेही आरोग्य सुधारावे. तसेच मातामृत्यू व बालमृत्यू दरात घट होऊन तो नियंत्रित राहावा यासाठी १ जानेवारी २०१७ पासून राज्यात प्रधानमंत्री मातृवंदना योजना ही प्रथमत: गर्भवती असलेल्या महिलांसाठी राबविण्यात येते. या योजनेअंतर्गत नागपूर जिल्ह्यात आजवर १ लाख ८ हजार ३०३ गर्भवती मातांची नोंदणी झाली आहे. त्यांना ४६ कोटींवरील अनुदानही वितरित करण्यात आले आहे. एकंदरीत ही योजना गर्भवती मातांसाठी वरदानच ठरत असल्याचे दिसून येत आहे.

ग्रामीण व आदिवासी भागात अनेक गर्भवतींना प्रसूतीच्या शेवटच्या टप्प्यापर्यंत काम करावे लागते. त्याचे परिणाम बाळावर व मातेवर होत असल्याने केंद्र सरकारने दारिद्र्य रेषेखालील तसेच दारिद्र्य रेषेवरील मातांसाठी १ जानेवारी २०१७ पासून ही योजना राबविली आहे. योजनेत गर्भवतीस तीन टप्प्यांत ५ हजार रुपये देण्यात येते. आरोग्य विभागाच्या माध्यमातून अशा महिलांचा शोध घेऊन त्यांना आर्थिक मदत केली जाते. या योजनेत दरवर्षी उद्दिष्ट दिले जाते. जिल्ह्यात १ ते ७ सप्टेंबर या कालावधीत प्रधानमंत्री मातृवंदना सप्ताह कार्यक्रम राबविण्यात येत आहे.

तालुकानिहाय तिन्ही टप्प्याचा लाभ प्राप्त महिला

तालुका गर्भवती मातांची संख्या

• नागपूर (ग्रा.) ४८८५

• हिंगणा ५२७३

• भिवापूर १४0३

• काटोल २0५७

• कुही २२८१

• कळमेश्‍वर २३६२

• कामठी ३000

• मौदा ३३२८

• रामटेक २७0२

• सावनेर ३६0६

• उमरेड २५४१

• नरखेड १९९५

• पारशिवनी २५८२