अल्पवयीन मैत्रीण निघाली खूनी; अपमानाचा बदला घेण्यासाठी केला खून

चंद्रपूर : भद्रावती येथे आढळलेल्या मुंडके नसलेल्या युवतीच्या खुनाचे रहस्य उलगडले आहे. युवतीची रूममेट असलेली अल्पवयीन मैत्रीणच मारेकरी निघाली. दरम्यान दाताळा मार्गावरील ईरई नदीच्या पुलाखाली रविवारी सायंकाळी एका कापडी पिशवीत एका मुंडके व कपडे सापडले. हे मुंडके व कपडे गुडियाचेच आहे, असे पोलिसांनी सांगितले.

मृत युवती नागपूर जिल्ह्यातील रामटेक येथील रहिवासी होती. अपमानाचा बदला घेण्याच्या उद्देशातून खून करण्यात आला. आरोपीला बेड्या ठोकल्या असून, हत्याकांडात मदत करणाऱ्या तिच्या मित्राचा शोध सुरू असल्याची माहिती जिल्हा पोलिस अधीक्षक अरविंद साळवे यांनी पत्रकार परिषदेत दिली.

भद्रावती-तेलवासा मार्गावरील शिवारात एका युवतीचा मुंडके नसलेला मृतदेह ४ एप्रिलला आढळला होता. पोलिस अधीक्षक अरविंद साळवे, अपर पोलिस अधीक्षक अतुल कुलकर्णी, स्थानिक गुन्हे शाखेचे पोलिस निरीक्षक बाळासाहेब खाडे यांनी घटनास्थळाला भेट दिली. मुंडके नसलेला मृतदेह नग्नावस्थेत होता. या प्रकरणाच्या तपासासाठी आठ पथके गठित करण्यात आली. सायबरतज्ज्ञांचीही मदत घेण्यात आली. परंतु, काहीच हाती लागले नाही. अखेर सायबरच्या मदतीने तांत्रिक तपासात मृत मुलीचा मोबाईल क्रमांक मिळाला. ती नागपूर जिल्ह्यातील रामटेक येथील रहिवासी असून, गुडिया तिवारी (वय २२) असल्याचे समोर आले. पोलिसांनी मृत युवतीच्या मोठ्या बहिणीशी संपर्क साधला. मृतदेहावरील व्रण, वापरातील वस्तूंवरून तिच्या बहिणीने खात्री केली.

तपासादरम्यान पथकाला मृत युवतीच्या रूम पार्टनरविषयी माहिती मिळाली. पोलिसांनी अल्पवयीन मुलीला ताब्यात घेतले. चौकशीत तिने सततच्या अपमानाचा बदला एका मित्राच्या मदतीने घेतल्याचे सांगितले.

पत्रकार परिषदेला अपर पोलिस अधीक्षक अतुल कुलकर्णी, पोलिस निरीक्षक बाळासाहेब खाडे उपस्थित होते. या तपासात सहायक पोलिस निरीक्षक जितेंद्र बोबडे, संदीप कापडे, पोलिस उपनिरीक्षक अतुल कावळे, राजेंद्र खनके, संजय आतकुलवार, सतीश बघमारे, गणेश भोयर, नईम खान, अनुप डांगे, मिलिंद जांभुळे, संदीप मुळे, प्रशांत नागोसे, मुजावर अली, वैभव पत्तीवार, राहुल पोंद्रे, भास्कर चिंचवलकर, संतोष पानघाटे, उमेश रोडे यांनी परिश्रम घेतले.

मित्राच्या मदतीने रचला कट

गुडिया तिवारी आणि अल्पवयीन मुलगी या रूम पार्टनर होत्या. मात्र, त्यांच्यात काही दिवसांपासून वाद होत होते. गुडिया ही अन्य मित्रांसमोर तिला अपमानास्पद वागणूक देत होती. त्यामुळे अपमानाचा बदला घेण्याचे तिच्या मैत्रिणीने ठरविले. तिने आपल्या एका मित्रासोबत माहिती गुडियाला ठार मारण्याचा कट रचला. अल्पवयीन मुलीने मृत गुडियाला चंद्रपुरातील वरोरा नाका चौकात ३ एप्रिलला रात्री ८.४५च्या सुमारास बोलाविले. तिघेही दुचाकीने भद्रावती येथील निर्जनस्थळी गेले. मैत्रिणीने गुडियाच्या मांडीवर चाकूने वार केले. मित्राने गळा दाबून खून केला. यानंतर चाकूने गुडियाचा गळा कापून तेथून पसार झाले.