जीवित, वित्तहानी टाळण्याला प्राधान्य : विजय वडेट्टीवार

नागपूर : अतिवृष्टी, महापूर, चक्रीवादळे अशा लागोपाठ विविध नैसर्गिक आपत्तींशी तोंड द्यावे लागत आहे. त्यामध्ये होणारी जीवित व वित्तहानी टाळण्यासाठी राज्य आपत्ती कृती दलासाठी अत्याधुनिक उपकरणे उपलब्ध करून देण्यात येत आहेत. प्रत्येक जिल्ह्यात ही यंत्रणा सुसज्ज राहील, यावर भर दिल्याची माहिती आपत्ती व्यवस्थापन, मदत व पुनर्वसन मंत्री विजय वडेट्टीवार यांनी सोमवारी दिली.

हिंगणा येथील राज्य राखीव पोलिस दल परिसरातील राज्य आपत्ती प्रतिसाद दलाच्या कार्यालयात भेट दिली. तसेच नैसर्गिक आपत्तीच्या काळात करावयाच्या उपाययोजनांबाबत माहिती घेतली. अंबाझरी तलावात आपत्त‍ी व्यवस्थापनासंदर्भात मॉकड्रीलच्या सादरीकरणाचीसुद्धा वडेट्टीवार यांनी पाहणी केली.

विभागीय आयुक्त प्राजक्ता लवंगारे-वर्मा, जिल्हाधिकारी विमला आर. राज्य राखीव पोलिस दलाचे उपमहानिरीक्षक महेश घुर्ये, समादेशक पंकज डहाणे यांच्यासह उपविभागीय अधिकारी इंदिरा पखाले, उपजिल्हाधिकारी सुजाता गंधे, विभागीय आपत्ती व्यवस्थापन अधिकारी नितेश भांबोरे, जिल्हा आपत्ती व्यवस्थापन अधिकारी अंकुश गावंडे उपस्थित होते.

नैसर्गिक आपत्तींचा सामना करताना जीवितहानी होणार नाही, याला प्राधान्य देण्यात येत आहे. त्यादृष्टीने यंत्रणा सुसज्ज करण्यात आली आहे. हिंगणा येथील कार्यालयामध्ये सोमवारी त्याबाबत आवश्यक बाबींचा आढावा घेतला. राष्ट्रीय आपत्ती प्रतिसाद दलाच्या धर्तीवर बळकटीकरण करण्यास विभागाचे प्राधान्य असल्याचे विजय वडेट्टीवार यांनी सांगितले.

नागपूर जिल्ह्याला सहा बोटी

राष्ट्रीय आपत्ती प्रतिसाद दलाकडून राज्य आपत्ती प्रतिसाद दलातील जवानांना प्रशिक्षण दिले जाते. त्यामुळे हा विभाग तांत्रिकदृष्‍ट्या अत्याधुनिक करण्यात येणार आहे. हे दल अत्याधुनिक झाल्यास नैसर्गिक आपत्तीकाळात प्राण वाचविण्यासाठी मजबूत टीम यशस्वीपणे सामना करू शकते. या पार्श्वभूमीवर नागपूर जिल्ह्याला सहा बोटी मिळाल्या आहेत. केंद्र व राज्य शासनाच्या या दोन्ही दलांच्या सहाय्याने राज्यात नैसर्गिक संकटांना तोंड देणे सोपे होणार असल्याचे विजय वडेट्टीवार म्हणाले.