Wardha Loksabha: अमर काळेंनी पंजा सोडत धरली तुतारी,वर्धा लोकसभेची मिळाली उमेदवारी; शरद पवारांच्या उपस्थितीत झाला प्रवेश

Wardha Loksabha Amar Kale: वर्धा लोकसभेच्या निवडणुकीत माजी आमदार अमर काळे महाविकास आघाडीचे उमेदवार होतील असे संकेत होते. मात्र, ते कोणत्या पक्षाककडून यावर चर्चा सुरू असताना त्यांना काँग्रेसचा हात सोडून राष्ट्रवादी काँग्रेस शरद पवार गटाची तुतारी धरत आपला प्रवेश निश्चित केला. पक्षाकडून त्यांच्या उमेदवारीची घोषणा करण्यात आली.

वर्धेत महायुतीकडून विद्यमान खासदार रामदास तडस आणि महाविकास आघाडीकडून आर्वीचे माजी आमदार अमर काळे यांच्या थेट लढतीचे चित्र आहे. यात वंचित आघाडी आणि बसपाचे उमेदवार असतील.

उमेदवारीची घोषणा झाली त्यावेळी अमर काळे स्वतः तिथे हजर होते. ते येत्या दोन एप्रिलला नामांकन दाखल करणार असल्याचे सांगण्यात आले आहे. तर रामदास तडस तीन एप्रिलला उमेदवारी दाखल करणार असल्याचे भाजपकडून सांगण्यात आले आहे.

वर्धा लोकसभा राष्ट्रवादी काँग्रेसकरिता सुटल्याने येथे परंपरागत काँग्रेसचा उमेदवार राहणार नसल्याचे स्पष्ट झाले. अमर काळे आतापर्यंत काँग्रेसकडून आर्वी विधानसभा लढले आहेत. लोकसभेकरिता काँग्रेसचे उमेदवार म्हणून त्यांच्या नावाची चर्चा होती. मात्र, जागा राष्ट्रवादीला गेल्याने त्यांना खुद्द शरद पवार यांनी दिल्लीला बोलावून राष्ट्रवादीकडून लढण्याची ऑफर दिली.

अमर काळे यांनी काँग्रेसच्या पक्षश्रेष्ठींशी चर्चा करून प्रवेशाबाबत परवानगी घेत महाविकास आघाडीचा उमेदवार म्हणून लढण्याची तयारी केली आहे.

नाराजांच्या मनधरणीनंतर प्रवेश

अमर काळे यांनी शरद पवार यांच्या शब्दाला मान देत राष्ट्रवादी काँग्रेसमध्ये प्रवेश करण्याचा निर्णय घेतला. त्यांच्या होकाराने वर्धा जिल्हा राष्ट्रवादी काँग्रेस शरद पवार गटाच्या नेत्यांची चांगलीच नाराजी झाली.

यामुळे शरद पवार यांनी सर्वच वर्धा जिल्हास्तरीय नेत्यांना बोलावून त्यांच्याशी चर्चा केली. त्यांनी दिलेल्या होकारामुळे अमर काळे यांनी पक्षात प्रवेश केला. यावेळी राष्ट्रवादी शरद पवार गटाचे नेते शरद पवार, प्रदेशाध्यक्ष जयंत पाटील, अनिल देशमुख, माजी आमदार सुरेश देशमुख, राजू तिमांडे, जिल्हाध्यक्ष सुनील राऊत, महासचिव अतुल वांदिले, किशोर माथनकर, अॅड. सुधीर कोठारी यांच्यासह इतरांची उपस्थिती होती.