Nagpur Accident : मी नव्हे, माधुरी सारडाने मर्सिडीज चालवली; नागपूर अपघातात नवा ट्विस्ट

नागपूर : मद्यधुंद अवस्थेत मर्सिडीज कार चालवून दोघांचा बळी घेतल्याचा आरोप असलेल्या ऋतिका ऊर्फ रितू दिनेश मालूने (वय ३९, रा. देशपांडे लेआउट) त्या रात्री मी नव्हे तर माधुरी सारडा कार चालवित होती, अशी माहिती पोलिसांना दिलेल्या पत्रामध्ये नमूद केली आहे.

तसेच, असे कृत्य करून तिने पोलिसांची दीशाभूल केली आहे. तिने तपासात सहकार्यही केलेले नाही. त्यामुळे त्यांचा अटकपूर्व जामीनअर्ज फेटाळण्यात यावा, असा युक्तिवाद सरकारी पक्षातर्फे करण्यात आला.

ही घटना २५ फेब्रुवारी रोजी रात्री घडली होती. रितू मालू व माधुरी शिशिर सारडा (वय ३७, रा. वर्धमाननगर) या दोघी सीपी क्लबमध्ये गेल्या. तेथे त्यांनी मद्यप्राशन केले. त्यानंतर मर्सिडिजने (एमएच ४९ : एएस ६१११) दोघी वर्धमाननगरकडे जायला निघाल्या.

रामझुल्यावर रितूने कारचा वेग वाढविला व मोपेडला (एमएच ३७ : क्यू २९४८) जोरदार धडक दिली. यात मोहम्मद हुसेन गुलाम मुस्तफा (वय ३४, रा. नालसाहब चौक, मोमिनपुरा) व मोहम्मद आतिफ मोहम्मद जिया (वय ३२, रा. अवस्थी चौक, जाफरनगर) यांचा मृत्यू झाला.

याप्रकरणी तहसील पोलिसांनी प्राणांतिक अपघाताचा गुन्हा दाखल करून रितूला अटक केली, तिला न्यायालयात हजर केले. न्यायालयाने तिची जामिनावर सुटका केली. पुढे तिच्यावर सदोष मनुष्यवधाचा गुन्हा दाखल करण्यात आला.

याप्रकरणी अटक टाळण्यासाठी रितूने सत्र न्यायालयात अटकपूर्व जामीनअर्ज दाखल केला होता. त्याला न्यायालयाने अंतरिम मंजुरी दिली होती. तो फेटाळण्यात आला.

त्यानंतर त्यांनी उच्च न्यायालयात धाव घेतली. त्यावर दोन्ही पक्षांचा युक्तिवाद ऐकून न्यायमूर्ती उर्मिला जोशी फाळके यांनी यावरील निर्णय राखून ठेवला. मालूतर्फे वरिष्ठ विधिज्ञ सुनील मनोहर यांनी बाजू मांडली.

२४० एमएल नव्हे, ३० एमएल मद्य प्यायले

रितू मालूने मद्य प्राशन केले. मात्र, केवळ तीस एमएल मद्य प्राशन केले असून कायद्यानुसार एका ठराविक मर्यादेत इतके मद्य प्राशन करून गाडी चालविता येते. ३० एमएल त्या मर्यादेतमध्ये येते. तसेच, त्यांनी संपूर्ण तपासात सहकार्य केले आहे.

त्यामुळे त्यांचा अटकपूर्व जामीन मान्य करण्यात यावा, असा युक्तिवाद मालूतर्फे करण्यात आला. परंतु, मालूने ३० नव्हे तर २४० एमएल मद्य प्यायले होते, अशी माहिती राज्य शासनाने उच्च न्यायालयाला दिली.