राज्यात 'गुंडा'राज? मुख्यमंत्र्यांविरुद्ध पोस्ट लिहिली म्हणून शिवसेना तालुकाध्यक्षाची सामाजिक कार्यकर्त्याला धमकी

Shivsenamen Threatened Social Worker: बुटीबोरी नगरपरिषदेचे आरोग्य सभापती आणि शिवसेनेचे (शिंदे गट) तालुकाध्यक्ष अनिस बावला यांनी कर्मयोगी फाउंडेशनचे संस्थापक पंकज ठाकरे यांना मुख्यमंत्र्यांच्या विरोधात पोस्ट टाकल्याप्रकरणी फोन करून धमकावले.

याप्रकरणी त्यांनी पोलिस अधीक्षक हर्ष पोद्दार यांच्याकडे तक्रार दाखल केली आहे.
मिळालेल्या माहितीनुसार, पंकज ठाकरे यांनी काही दिवसांपूर्वी फेसबुकवर एक पोस्ट टाकली. त्यात राज्याचे मुख्यमंत्री एकनाथ शिंदे आणि उपमुख्यमंत्री अजित पवार यांच्या उल्लेख केला. या पोस्ट वरून अनिस बावला यांनी त्यांना फोन वरून पोस्टबद्दल विचारणा करीत, धमकाविले. शिवाय त्यांना भेटून समज देण्याबाबतही सुनावले.

ठाकरे यांनी त्यांना देशात हुकूमशाही सुरू आहे का, असा सवाल केला असता, उद्या सांगतो काय आहे ते, अशी धमकी बावला यांनी दिली. या प्रकारामुळे ठाकरे यांनी पोलिस अधीक्षक हर्ष पोद्दार यांच्याकडे लेखी तक्रार नोंदवित कारवाईची मागणी केली. तसेच गृहमंत्र्यांच्या जिल्ह्यातच व्यक्ती स्वातंत्र्यावर गदा आणणारी दडपशाही सुरू असल्याचा आरोपही केला. बुटीबोरी पोलिसांना विचारणा केली असता, त्यांनी अद्याप तक्रार आली नसल्याचे स्पष्ट केले. (Latest Marathi News)