नागपूर : अखेर रेल्वे स्थानकावर कोरोना चाचणी सुरू

नागपूर : कोरोनाचा प्रकोप वाढत असूनही मध्य रेल्वे स्थानकावर बाहेरून येणाऱ्या प्रवाशांची चाचणी केली जात नव्हती. विशेषतः दिल्लीत कोरोनाचा प्रकोप वाढला आहे. तरीही तेथून येणाऱ्या प्रवाशांची कोरोना चाचणी होत नव्हती. ‘सकाळ’ने याबाबत वृत्त प्रकाशित करताच प्रशासन यंत्रणा सतर्क झाली. शनिवारपासून येथे चाचणीला सुरवात झाली. दुपारी दोन ते रात्री आठ वाजेपर्यंत १० संशयित प्रवाशांची ॲन्टीजेन चाचणी करण्यात आली.

महानगरपालिकेच्या वतीने रेल्वे स्थानकाच्या प्रवेशद्वाराजवळ व्यवस्था करून कोरोनाची ॲन्टीजेन आणि आरटीपीसीआर या दोन्ही चाचण्यांची सुविधा उपलब्ध करून देण्यात आली आहे. संशयित प्रवाशांवर नजर ठेऊन त्यांची ॲन्टीजेन चाचणी करण्यात आली. यामध्ये ओडिशा, अलाहाबाद, गोंदिया आणि स्थानिक सफाई कर्मचारी व कुलींचा अशा १० लोकांची चाचणी करण्यात आली.

या सर्वांचा अहवाल निगेटिव्ह आला. जर ॲन्टीजेन चाचणीत ज्या प्रवाशांचा अहवाल पॉझिटिव्ह आला त्यांची पुन्हा आरटीपीसीआर चाचणी करून त्याचे नमुने मेयो रुग्णालयात पाठविण्यात येणार असल्याचे कर्मचाऱ्यांनी सांगितले. रविवारी सकाळी ८ ते रात्री ८ वाजता पर्यंत चाचणी करण्यात येणार आहे. त्यानंतर सोमवारपासून २४ तास रेल्वे स्थानकावर ही सेवा प्रवाशांसाठी उपलब्ध असेल. दिल्लीसह इतरही ठिकाणची कोरोनाची स्थिती गंभीर होत चालली आहे.