Nagpur Crime: कारागृहातून सुटले, घरफोडी करायला लागले...दोघांना अटक ; सहा गुन्ह्यांचा उलगडा

Nagpur Crime: कारागृहातून सुटून आल्यावर दोन घरफोड्यांनी पुन्हा पारडीसह इतर ठिकाणी घरफोडी केल्याची माहिती उघडकीस आली आहे. पारडी पोलिसांनी याप्रकरणी दोघांना अटक करून सहा घरफोडींचा खुलासा केला आहे.

मोहम्मद फय्याज एजाज अंसारी ( वय २२, रा. गंगाबाग, पारडी), अफरोज शमशाद अंसारी, (वय २२, रा. गिरजा नगर, पारडी) अशी आरोपींची नावे आहेत. पोलिसांनी दिलेल्या माहितीनुसार, १४ फेब्रुवारीला मध्यरात्री साडेबारा वाजताच्या सुमारास अंबेनगर येथील मारोती सोसायटीमध्ये राहणारे देवीप्रसाद गोबऱ्यासाव जामुनपानी (वय ४५) हे बालाघाटला गेले असताना, त्यांच्या घरात शिरून चोरट्याने २० हजार रोख रकमेसह सोन्याचे दागिने, असा ९५ हजार ७५० रुपयांचा ऐवज चोरून नेला.

त्यांनी दिलेल्या तक्रारीवरून पोलिसांनी गुन्हा दाखल करून पोलिस निरीक्षक रणजीत सिरसाट यांच्या नेतृत्वात आरोपींचा शोध सुरू केला. तपासात चोरटे हे रेकॉर्डवरील आरोपी असल्याची बाब समोर आली. ते आठ ते दहा दिवसांपूर्वीच कारागृहातून सुटून आल्याचे निदर्शनास येताच, त्यांना ताब्यात घेऊन चौकशी केली असता, त्यांनी वाठोडा, नंदनवन, कन्हान, कुही येथेही घरफोडी केल्याची कबुली दिली. त्यावरून पोलिसांनी गुन्हा दाखल करीत अटक करून चौकशी सुरू केली आहे. (Latest Marathi News)