Nagpur : शेतकऱ्यांचा शेतातच मुक्काम! जंगली डुकरांचा हैदोस, पेरलेले बियाणे केले फस्त

Nagpur - चिखलदरा तालुक्यातील जामली परिसरात यावर्षी जूनच्या शेवटच्या आठवड्यात जास्तीत जास्त शेतकऱ्यांनी मका पिकाची पेरणी केली. मात्र जंगली डुकरे पेरणी केलेला मका बियाणे खाऊन फस्त करीत आहेत. या डुकरांपासून बियाणे वाचविण्यासाठी शेतकरी शेतात जागली करीत आहेत.

शेतकरी दरवर्षी सोयाबीनची पेरणी करायचे, पण या पिकाला आता पाहिजे त्याप्रमाणात झडती मिळत नसल्याने शेतकरी मका पिकाकडे वळले. मका हे पीक सोपे आणि कमी खर्चात येत असून एकरी २० क्विंटल उत्पन्न मिळते.

तसेच मक्याला साधारण २००० रुपयांचे भाव मिळत असल्याने शेतकऱ्यांनी यावर्षी मका पिकाची महागडे बियाणे आणून टोबणी केली, पण जंगली डुकरे टोबलेले बियाणे एकाच रात्री खाऊन फस्त करीत आहेत.

त्यामुळे दुबार पेरणी करावी लागू नये म्हणून या परिसरातील शेतकरी रात्रीला कुठल्याही धोक्याची पर्वा न करता उघड्या जमिनीवर जागरण करून रात्र घालवीत आहेत.तरी वनविभागाने या डुकरांचा बंदोबस्त करावा, अशी परिसरातील शेतकऱ्यांची मागणी आहे.

बंदोबस्त करण्याची मागणी

रात्रीला डुकराचे कळप शेकडोच्या संख्येने फिरतात व मक्याचे पीक शोधतात. शेतकऱ्यांनी शेतात जागरण न केल्यास अख्खे पीकच उखडून काढतात. त्यामुळे शेतकऱ्यांचे मोठ्या प्रमाणात नुकसान होत आहे. तरी वनविभागाने या डुकरांचा बंदोबस्त करावा, अशी परिसरातील शेतकऱ्यांनी मागणी केली आहे.