नागपूर, वीस कोटी रुपयाचा घोटाळा केला असल्याची बतावणी करीत, मुंबईच्या व्यावसायिकाचे बजाजनगर पोलिस ठाण्यातील दोन बीटमार्शलसह तिघांनी अपहरण करून १५ लाख रुपयाची खंडणी मागितल्याची केल्याची धक्कादायक माहिती समोर आली आहे. याप्रकरणी पोलिसांनी चौघांना अटक केली. अजय मोतीराम वाघमारे (वय ३७,रा.खारगर, मुंबई) यांनी दिलेल्या तक्रारीवरून पोलिसांनी गुन्हा दाखल केला.
गौरव पुरुषोत्तम पराळे (वय ३०, रघुजीनगर), राजेश उत्तमराव हिवराळे (वय ३०, सीताबर्डी क्वार्टर), आकाश राजू ग्वालबंशी (वय ३०, रा. संजय गांधीनगर, हुडकेश्‍वर) अशी आरोपीचे नाव आहे. विक्रांत मेश्राम (रा.उमरेड) हा फरार आहे.
पोलिसांनी दिलेल्या माहितीनुसार, अजय वाघमारे हे आयबीन फ्लिपकॉर्प ट्रेड कंपनीचे मालक असून ते जागेची खरेदी-विक्री आणि धान्यांची विदेशात आयात-निर्यातही करतात. रविवारी (ता.२९) सकाळी त्यांनी नागपुरातील हुडकेश्‍वर मार्गावर असलेल्या क्वीन्स सेलिब्रेशन लॉनमध्ये नागपूर आणि आजूबाजूच्या परिसरातील सर्वच नवीन ग्राहकांसाठी बैठकीचे आयोजन केले होते. दुपारी दीड वाजताच्या सुमारास ते लॉन परिसरात आले. यावेळी त्यांच्यासोबत सहकारी दिलीप शिंदे आणि गिरीधर निखारे होते. तिघेही वाहनात असताना, तिथे बजाजनगर येथील बीटमार्शल गौरव पराळे पोलिस वर्दीत आला. त्याने मागे बसलेले दिलीप शिंदे यांना अजय वाघमारे कोण आहे? अशी विचारणा केली. यावेळी त्याने मागे इनोव्हा (एमएच२७बीई०९००) उभी असून तिथे साहेब असल्याची बतावणी केली. त्यानुसार अजय वाघमारे हे त्यांच्यासोबत कारकडे गेले. गौरवने वाघमारे यांना कारमध्ये बसण्यास सांगितले. यावेळी कारमध्ये राजेश हिवराळे आणि कारचालक म्हणून आकाश ग्वालबंशी उपस्थित होते. त्यांनी अजय यांना कारमध्ये बसवून त्यांच्याकडील तीन मोबाइल आणि वॉलेट काढून घेत पोलिस ठाण्यात नेण्यात येत असल्याची माहिती दिली.
यावेळी अजय वाघमारे यांनी विचारणा केली असता, पोलिसांनी त्यांना २० कोटीच्या घोटाळ्याप्रकरणी अटक करण्यात येत असल्याचे सांगितले. मात्र, अजय यांनी असा कुठलाही घोटाळा केला नसल्याचे सांगताच पोलिसांनी त्यांना सर्व पुरावे असून विविध कलमांतर्गत गुन्हा दाखल करण्याची धमकी दिली. तसेच त्यातून सुटका करायची असल्यास पंधरा लाख रुपयाची मागणी केली. त्याचे मोबाईल स्वीच ऑफ करीत, त्यांना ठिकठिकाणी नेऊन धमकावण्यास सुरुवात केली. त्यामुळे अजय यांनी पैसे देण्याचे मान्य करीत, सहकाऱ्याला फोन करण्याची विनंती केली. मात्र, राजेश हिवराळे याने त्यांचे सहकारी दिलीप शिंदे यांचेशी संपर्क साधून त्यांना पंधरा लाख रुपयाची व्यवस्था करण्यास सांगितले. शिंदे यांनी प्रकरणाची माहिती त्यांचे सहकारी झोडे यांना देत, पोलिस ठाण्यात सूचना देण्यास सांगितले. त्यांनी हुडकेश्‍वर पोलिसांना माहिती देताच, पोलिस उपायुक्त रश्‍मीता राव आणि सहायक पोलिस आयुक्त विनायक कोते यांच्या मार्गदर्शनाखाली वरिष्ठ पोलिस निरीक्षक भेदोडकर यांनी तपास सुरू केला. यावेळी पथकाने वर्धा मार्गावरील हॉटेल रेडिसन ब्ल्यु परिसरातून ताब्यात घेतले आणि अजय वाघमारे यांची सुटका केली. त्यानंतर चौघांवरही दाखल करीत गुन्हा नोंदवून त्यांना अटक केली. त्यांना दोन दिवसाची पोलिस कोठडी सुनावण्यात आली आहे.
विक्रांतने दिली टीप
आकाश आणि विक्रांत दोघेही राजेश आणि गौरव यांचे मित्र आहे. नागपुरात काही व्यापाऱ्यांशी भेट घेण्याच्या अनुषंगाने अजय वाघमारे हे हुडकेश्‍वर पोलिस ठाण्याच्या हद्दीत काही दिवसांपासून राहत होते. ही बाब विक्रांतला कळताच, त्याने त्याच्याकडून पैसे उकळण्यासाठी योजना तयार केली. त्यात राजेश आणि गौरवला सहभागी करून घेतले. रविवारी अजय वाघमारे यांचे अपहरण करीत, अपहरण करीत खंडणी मागितली.
फोन केला आणि फसला
अजय वाघमारे यांचे अपहरण करीत त्यांना खंडणी मागण्यात येत असताना, त्यांनी इतके पैसे जवळ नसल्याचे सांगून सहकाऱ्याला फोन करून मागून घेतो असे सांगितले. त्यामुळे त्यांच्या मोबाइलवरून दिलीप शिंदे यांना राजेशने फोन केला. यावेळी दिलीप यांनी त्यांचे सहकारी झोडे यांना पोलिसांना फोन करायला लावून माहिती दिली. त्यामुळे पोलिसांनी ॲक्टीव्ह होत त्यांचे लोकेशन शोधण्यास सुरुवात केली. त्‍यावरून चौघांनाही अटक केली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.