Nagpur : उपराजधानीत रात्रभर धुवांधार; 9 तासांत तब्बल 121 मिलिमीटर पावसाची नोंद, वीजपुरवठा खंडित, घरांत शिरले पाणी

नागपूर : उपराजधानीत जोरदार पाऊस (Nagpur Rain Update) आणि वादळी वाऱ्यामुळं शहरातील अनेक भागात विजेचे खांब, झाड पडल्याच्या घटना घडल्या आहेत. त्यामुळं काही भागात वीजपुरवठा खंडित झाला आहे. तर, काही ठिकाणी घरात पाणी शिरुन मोठं नुकसान झालंय.

दरम्यान आज यवतमाळ, चंद्रपूर आणि गडचिरोली इथं उद्भवलेल्या पूरस्थितीनंतर आता विदर्भात परत एकदा अतिवृष्टीचा इशारा देण्यात आलाय. आज गुरुवार, २७ जुलै रोजी गडचिरोली व चंद्रपूरला ‘रेड अलर्ट’ देण्यात आला असून नागपूरसह अन्य काही जिल्ह्यांना ‘ऑरेंज अलर्ट’ देण्यात आला आहे.

नागपूर शहरात रात्रीपासून जोरदार पाऊस कोसळत असल्यामुळे वीजपुरवठा खंडित झाला आहे. पहाटे साडेपाचपर्यंत नऊ तासांमध्ये तब्बल १२१ मिलिमीटर पावसाची नोंद झाली आहे. दरम्यान, आज नागपूरसह भंडारा, गोंदिया व यवतमाळ या जिल्ह्यांना ‘ऑरेंज अलर्ट’ देण्यात आला असून प्रशासनाला सतर्क राहण्याचे आदेश देण्यात आले आहेत.

गडचिरोली व चंद्रपूर या जिल्ह्यांना ‘रेड अलर्ट’ देण्यात आला असून प्रशासनाला पूर परिस्थितीच्या दृष्टिकोनातून सज्ज राहण्याचे आदेश देण्यात आले आहेत. याखेरीज अन्य जिल्ह्यांनासुद्धा ‘येलो अलर्ट’ देण्यात आला आहे. शिवाय, हवामान विभागानं दिलेल्या अतिमुसळधार पावसाचा अंदाज पाहता आज मुंबई, ठाणे, रत्नागिरी आणि चंद्रपूरमधील शाळा आणि महाविद्यालयांना सुट्टी जाहीर करण्यात आली आहे.