नागपूर : एसटी कर्मचाऱ्यांना हवे शासकीय कर्मचाऱ्यांप्रमाणे भत्ते

नागपूर : महाराष्ट्र राज्य मार्ग परिवहन महामंडळातील कर्मचाऱ्यांना माहे ऑक्टोबरचे देय नोव्हेंबर महिन्याचे वेतन दिवाळीपूर्वी अदा करण्यात यावे. तसेच महागाई भत्ता, घरभाडे भत्ता, वार्षिक वेतनवाढीचा दर शासनाप्रमाणे लागू करून थकबाकी एक रकमी दिवाळीपूर्वी देण्यात यावी अशा मागणी एसटी महामंडळातील सर्व कामगार ससंघटनांच्या संयुक्त कृती समितीतर्फे करण्यात आली आहे. दिवाळीपूर्वी भत्ते अदा करण्यात यावे या मागणीसाठी २७ ऑक्टोबरला उपोषण करण्यात येणार आहे.

एसटी महामंडळातील कर्मचारी आर्थिक टंचाईत आहेत, यामुळे दुर्देवाने कर्मचाऱ्यांच्या आत्महत्येच्या घटना घडत आहेत. एस.टी महामंडळातील कमी पगार व त्यातील अनियमितता यामुळे आत्महत्या होत असल्याचे आत्महत्याग्रस्त कर्मचाऱ्यांनी चिठ्ठीत लिहून ठेवले आहे. ही बाब गंभीर आहे. एस.टी. कर्मचाऱ्यांना वेतन अल्प आहे. त्यात लॉकडाऊन हजेरी न दिल्याने रोख वेतन (निव्वळ देय) अत्यल्प होणार आहे.

दिवाळीसारखा सण तोंडावर आले. त्यात मागील सहा महिन्यांपासून मुलभूत गरजा भागविण्यासाठी कर्ज काढलेले आहे. घरभाडे, राशन, आई-वडीलांचे आजारपण, मुलांचे शिक्षण उसणवारीमुळे करणे कठिण झाले हे. दिवाळी सण तोंडावर आहे. त्यामुळे एस.टी.कर्मचाऱ्यांचे वेतन व महागाई भत्ता थकबाकी, वार्षिक वेतनवाढीची थकबाकी, घरभाडे भत्त्याची थकबाकी देण्यात यावी अशी मागणी महाराष्ट्र एसटी वर्कर्स काँग्रेस (इंटक) संघटनेचे सरचिटणीस मुकेश तिगोटे यांनी केली आहे.

महाराष्ट्र राज्य मार्ग परिवहन महामंडळातील संयुक्त कृती समितीत महाराष्ट्र एसटी वर्कर्स कॉंग्रेस (इंटक), महाराष्ट्र एसटी कामगार संघटना, महाराष्ट्र एसटी कामगार सेना, कास्ट्राईब एसटी कर्मचारी संघटना, महाराष्ट्र मोटार कामगार फेडरेशन यासह एकूण १७ संघटना सहभागी आहेत. महागाई भत्ता, वार्षिक वेतनवाढीचा दर ३ टक्के , घरभाडे भत्ता ८, १६, २४ टक्के देण्याचे मान्य केले होते परंतु अद्यापपर्यंत अंमलबजावणी करण्यात आली नाही.

- मुकेश तिगोटे, सरचिटणीस-महाराष्ट्र एसटी वर्कर्स कॉंग्रेस (इंटक)