नागपूर : सायबर गुन्हेगाराच्या जाळ्यात अख्खे कुटुंब

नागपूर : सायबर गुन्हेगाराने गुंतवणुकीवर जास्त लाभ मिळवून देण्याचे आमिष दाखवून चक्क एका उच्चशिक्षित कुटुंबाची तीन लाखांनी फसवणूक केली. प्रकरणी चमपूरण ममताणी यांच्या तक्रारीवरून जरीपटका पोलिसांनी गुन्हा नोंदविला.

इंदिरा गांधी कॉलनी निवासी चमपूरण ममतानी हा पदव्युत्तर अभ्यासक्रमासाठी असलेल्या राष्ट्रीय अभियांत्रिकी प्रवेश परीक्षेची तयारी करतो. काही दिवसापूर्वी त्याला सायबर गुन्हेगाराने एक लिंक पाठविली.

गुंतवणूक करा आणि लाभ मिळवा अशी ती लिंक होती. त्याने लिंकवर जाऊन ऑनलाइन खाते उघडले. एक हजार रूपयाची गुंतवणूकही केली. त्यावर त्याला ७१ रुपये मिळाले. त्यानंतर ममतानीने २ हजारांची गुंतवणूक केली. त्यावर ३०० रुपये लाभ मिळाला. लाभ मिळत असल्याने त्याचा विश्वास बसला अन् तो सायबर गुन्हेगारांच्या जाळ्यात अडकला.

त्यानंतर त्याने बहिण, भाऊ आणि बहिणीचेही खाते उघडले. संपूर्ण कुटुंबानेच ३ लाख रूपयाची गुंतवणूक केली. त्यानंतर मात्र, चमपुरम आणि कुटुंबीयांना पैसे मिळणेच बंद झाले. लिंकही बंद झाली आणि फोनही बंद झाले. जरीपटका पोलिसांनी आरोपी विरुद्ध गुन्हा नोंदविला.