Sunil Kedar: माजी आमदार केदार यांना जंतूसंसर्ग; चार तज्ज्ञांच्या निरीक्षणात उपचार

Sunil Kedar: नागपूर जिल्हा मध्यवर्ती सहकारी बँकेतील १५० कोटींच्या रोखे गैरव्यवहारात सत्र न्यायालयाने पाच वर्षांच्या कारावासाची शिक्षा सुनावलेले काँग्रेसचे सावनेर येथील माजी आमदार आणि माजी मंत्री सुनील केदार यांना मूत्रमार्गात जंतूसंसर्ग झाल्याने त्यांच्या क्रिएटिनिनमध्ये वाढ झाली. त्यामुळे तुर्तास त्यांच्यावर ‘मेडिकल’मधील चार विशेष तज्ज्ञांच्या देखरेखीखाली उपचार केले जात आहेत.

केदार यांना मायग्रेनचाही त्रास आहे. त्याचप्रमाणे गेल्या शुक्रवारी शिक्षा सुनावल्यानंतर त्यांना छातीत दुखू लागले. यामुळे मेडिकलच्या अतिदक्षता विभागात दाखल करण्यात आले. त्यानंतर केदार यांचे सिटी स्कॅन आणि एन्जिओग्राफीदेखील करण्याचा सल्ला डॉक्टरांनी दिला होता.

मात्र, मंगळवारी त्यांच्या शरीरातील ‘टीएलसी’चे प्रमाण ३० हजारांपर्यंत वाढले होते. हे प्रमाण सामान्य झाल्यानंतरच त्यांच्या या निदान चाचण्या केल्या जाण्याची शक्यता आहे.

शिक्षेवरील स्थगिती अन्‌ जामिनावर उद्या निकाल-

एनडीसीसी बँक गैरव्यवहारप्रकरणी न्यायालयाच्या निकालाला आव्हान देत सुनील केदार यांच्यासह चार आरोपींनी शिक्षेला स्थगिती आणि जामिनासाठी अर्ज दाखल केला आहे. परंतु, आरोपींच्या युक्तिवादावर अतिरिक्त लेखी उत्तर दाखल करण्यासाठी राज्य शासनाने १ जानेवारी पर्यंत मुदत वाढवून देण्याची विनंती केली होती. न्यायालयाने सरकारची विनंती फेटाळून लावत उद्या (ता. २८) निकाल देण्याचे निश्‍चित केले. (Latest Marathi News)