हे काय? आधी निगेटिव्ह, मृत्यूनंतर पॉझिटिव्ह...

मौदा (नागपूर) : नागपूर जिल्ह्यात कोरोनाने थैमान घातले आहे. रुग्णांच्या संख्येत दिवसेंदिवस वाढ होत आहे. मृतांचा आकडाही वाढतच चालला आहे. मात्र, असे असताना नागरिक मनावर घेत नसल्याचे दिसून येत आहे. आता कोरोना गावखेड्याही पसरला आहे. कोरोनाच्या चाचण्यांमध्ये वाढ झाली आहे. त्यामुळे रुग्णांची संख्याही वाढत आहे. मौदा तालुक्यातील एका व्यक्तीची घेतलेली चाचणी प्रश्न उपस्थित करणारी आहे. काय झाले नेमके वाचा...

मौदा तालुक्यात कोरोना बळीचा आकडा तीनवर पोहोचला आहे. शुक्रवारी (ता. २१) खात ३, निमखेडा १, खरडा २, मौदा २ व बेरडेपार १ (मृत्यूनंतर) अशा ९ व्यक्तींचा अहवाल पॉझिटिव्ह आला. तालुक्यात बाधितांच्या संख्येत होणारी वाढ चिंता वाढविणारी आहे. तालुक्यातील बेरडेपार येथील ४७ वर्षीय व्यक्तीचा अहवाल मृत्यूनंतर पॉझिटिव्ह आला. त्यामुळे कोरोना चाचणीवर संशय बळावला असून तर्कवितर्क लावले जात आहेत. 

बेरडेपार येथील व्यक्तीची दोनदा रॅपिड अँटिजेन चाचणी केली असता ती निगेटिव्ह आली. परंतु, बुधवारला प्रकृती बिघडल्यामुळे नागपूर येथील शासकीय रुग्णालयात दाखल करण्यात आले. नंतर लता मंगेशकर रुग्णालयात हलविण्यात आले. मात्र, उपचारादरम्यान त्याचा मृत्यू झाला. मृत्यूनंतर शासकीय रुग्णालयात कोरोना चाचणी करण्यात आली. चाचणी पॉझिटिव्ह निघाल्याने चिंता व्यक्त केली जात आहे. 

हेही वाचा : रामायणातील ‘हनुमान’ने नागपुरात दिली होती किंग काँगला धोबीपछाड; वाचा रुस्तम-ए-हिंदबद्दल...

विश्वास कोणत्या चाचणीवर? 
रॅपिड अँटिजेन चाचणीत पॉझिटिव्ह निघाल्यानंतर आरटीपीसीआर चाचणी निगेटिव्ह येत आहे, असे एकंदरीत निदर्शनास येत आहे. परंतु, रॅपिड अँटिजेन चाचणी निगेटिव्ह असतानाही रुग्णाच्या मृत्यूनंतर पॉझिटिव्ह चाचणी येत आहे. विश्वास कोणत्या चाचणीवर करावा, असा संभ्रम नागरिकांना पडला आहे. 

(संपादन : मेघराज मेश्राम)