गडकरींच्या एका फोनवर नेपाळमधील मृत भारतीयाचा मृतदेह परत आणता आला, धम्म सहलीसाठी गेलेल्या व्यक्तीचं झालं होतं निधन

Nitin Gadkari : प्रभाग क्रमांक ३३ मधील कौसल्यायननगर येथील रहिवासी स्वप्नील देविदास मेश्राम यांचे लुंबिनी, नेपाळ येथे निधन झाले. मृतदेह सुपूर्द करताना अडचणी निर्माण झाल्याने ही बाब केंद्रीय मंत्री नितीन गडकरी यांना कळविण्यात आली. त्यांच्या प्रयत्नामुळे उद्या (ता. १९) शव शहरात दाखल होईल.

भदन्त गौतम, भदन्त तिस्स बोधी यांच्या नेतृत्वात स्वप्नील मेश्राम आणि ५० पर्यटक एका ट्रॅव्हल्सने १० डिसेंबर रोजी दीक्षाभूमी येथून बुद्धगयाकडे निघाले. बुध्दगया येथून १६ तारखेला शेवटचे स्थळ लुंबिनी येथे पोहचताच बसमध्येच स्वप्नील यांना ह्रदयविकाराचा झटका आला. त्यांना त्वरित रुग्णालयात दाखल केले पण डॉक्टरांनी तपासून मृत घोषित केले. शवविच्छेदन केल्यानंतर जवळचे नातेवाईक सोबत नसल्याने मृतदेह सुपूर्त करण्यात अडचण आली. याबाबत नितीन गडकरींना कळविण्यात आले.

१८ डिसेंबर रोजी दिवसभर भारत-नेपाळ राजदूत कार्यालयात कायदेशीर प्रक्रिया करून रात्री ९ वाजता मृतदेह भदन्त गौतम आणि भदन्त तिस्स बोधी यांच्याकडे सुपूर्द केला. उद्या (ता. १९) लुंबिनी ते नागपूर ९८८ किमीचा प्रवास पूर्ण करून रात्री उशिरापर्यंत ते नागपुरात पोहोचतील. मंगळवारी रात्री मोक्षधाम येथे अंत्यसंस्कार होणार आहे. (Latest Marathi News)