पुरणपोळीचा पाहुणचार भोवला; एकाच घरातील सहा जणांना विषबाधा

नरखेड (जि. नागपूर) : नरखेड येथून जवळच असलेल्या परसोडी (राऊत) येथील पाहुण्यांसह एकाच कुटुंबातील सहा सदस्यांना विषबाधा (Poisoning of six members) झाली. त्यांच्यावर नागपूरच्या शासकीय वैद्यकीय महाविद्यालयात उपचार सुरू आहेत. विषबाधा झालेल्या सर्वांना तातडीने आरोग्य सेवा मिळावी, यासाठी माजी उपसभापती वैभव दळवी स्वतः ग्रामीण रुग्णालय नरखेड येथे उपस्थित होते. प्राथमिक उपचार केल्यानंतर त्यांना लगेच वसंतराव देशमुख प्रतिष्ठानच्या रुग्णवाहिकेतून नागपूरला पाठविण्यात आले. (Poisoning-of-six-people-in-the-same-household-in-Nagpur-rural)

मंगळवारी दुपारी एक वाजताच्या सुमारास गंगाधर दुर्वे यांच्याकडे पाहुणे म्हणून आलेल्यांसह चिमुकल्या सहा जणांसाठी पुरणपोळीचा पाहुणचार करण्यात आला होता. पुरणपोळी खाल्यानंतर एकाच घरातील सहा जणांना पोटदुखीचा त्रास सुरू झाला. ही बाब उपसरपंच अशोक राऊत यांनी माजी उपसभापती वैभव दळवी यांच्या कानावर घातली. दळवी यांनी तातडीने वसंतराव देशमुख प्रतिष्ठानच्या रुग्णवाहिकेशी संपर्क साधून घटनास्थळी धाव घेतली. परिस्थितीचे गांभीर्य ओळखून विषबाधा झालेल्यांना लगेच ग्रामीण रुग्णालयात उपचारार्थ दाखल करण्यात आले.

विषबाधा झालेल्यांमध्ये गंगाधर दुर्वे यांच्या कुटुंबातील मुलगा अंकुश गंगाधर दुर्वे (वय ३०), सून सीमा अंकुश दुर्वे (वय २६), भाविका अंकुश दुर्वे (वय ३), अलकेश अंकुश दुर्वे (वय ११) व मुलीकडे पाहुणे म्हणून आलेले वेदांश बबलू उईके (वय ११), सुमित बबलू उईके (वय ५) यांचा समावेश आहे. त्यांच्यावर ग्रामीण रुग्णालयात प्राथमिक उपचार केल्यानंतर प्रकृती गंभीर असल्यामुळे तातडीने नागपूरच्या शासकीय वैद्यकीय रुग्णालयात पाठविण्यात आले.

विषबाधा रसामुळे की पुरणपोळीमुळे?

सोमवारी सायंकाळी गंगाधराव यांच्याकडील पाहुण्यांना रसाचा पाहुणचार केला होता. त्याचबरोबर मंगळवारी (ता. २९) सकाळी शिजवून ठेवलेल्या पुरणाच्या पोळ्यासुध्दा त्यांच्या खाण्यात आल्या. रात्री शिल्लक असलेला रस सकाळी खाल्ल्यामुळे सर्वांना उलटी, तोंडांत फेस व पोटदुखी जाणवू लागली. त्यानंतर त्यांची तब्येत खालावत गेली. त्यामुळे नेमकी विषबाधा कशामुळे झाली, हे कळू शकले नाही.

(Poisoning-of-six-people-in-the-same-household-in-Nagpur-rural)