Nagpur Crime : तीन पिस्तुलांसह दरोडेखोरांची टोळी जेरबंद,हिंगणा परिसरात वाठोडा पोलिसांची कारवाई

नागपूर : वाठोडा पोलिसांनी दरोडेखोरांच्या टोळीला हिंगणा भागातून मोठ्या शिताफीने अटक केली. आरोपींकडून २ पिस्टल, १ रिव्हॉल्वर, जिवंत काडतूस आणि दोन चाकू असा शस्त्रसाठा जप्त केल्याची माहिती पोलिस उपायुक्त रश्मिता राव यांनी पत्रपरिषदेत दिली.

कुणाल सुरेश हेमने (२७), विशाल ऊर्फ फल्ली पृथ्वीलाल गुप्ता (२२), सुजित भाऊराव घरडे (२३) सर्व रा. वाठोडा आणि कुलदीपसिंह लखनसिंग बावरी (२९) रा. बुटीबोरी अशी अटकेतील दरोडेखोरांची नावे आहेत. त्यांचा साथीदार अफसर अंडा हा फरार आहे. तो मुळचा वर्धेचा असून गुन्हेगारी प्रवृत्तीचा आहे. कुणालवरही गंभीर स्वरूपाचे ९ गुन्हे आहेत. सध्या तो ड्रायव्हिंग करतो. विशाल हा तीन महिन्यापूर्वीच कारागृहातून बाहेर आला.

वाठोडा येथील रहिवासी आरीफ इनायत खान पठाण (२८) याला आरोपी चारचाकी वाहनात बसवून जबरण घेऊन गेले. शस्त्राच्या धाकावर दहा हजार रुपयांची मागणी केली. माहिती मिळताच आरीफचे वडील आणि पत्नी सुद्धा घटनास्थळी पोहोचले. वडिलांनी गयावया केली.

मात्र, आरोपी ऐकण्यास तयार नव्हते. दहा हजार रुपये मिळाले नाही तर खून करण्याची धमकी दिली. ही घटना १२ ऑक्टोबरला वाठोडा पोलिस ठाण्याच्या हद्दीत घडली. आरीफच्या तक्रारीवरून पोलिसांनी गुन्हा नोंदविला. तक्रार प्राप्त होताच चोवीस तासात चारही आरोपींना अटक केली.

आरोपी गुन्हेगार प्रवृत्तीचे असल्याने त्यांचा पोलिसांकडे रेकॉर्ड होता. पोलिसांनी गोपनीय माहितीच्या आधारे त्यांचा शोध घेतला असता चौघेही हिंगणा येथील एका हॉटेलमध्ये दडून होते. पोलिसांनी सापळा रचून चौघांनाही अटक केली. न्यायालयाने त्यांना १९ ऑक्टोबर पर्यंत पोलिस कोठडी सुनावली.

खुनाच्या सुपारीचा मागितला हिस्सा

सदर पोलिस ठाण्याच्या हद्दीत २०१९ मध्ये घडलेल्या ऋषी खोसला हत्याकांडात आरीफचा सहभाग होता. कारागृहात आरोपी कुणाल आणि आरीफ हे दोघेही होते. ऋषी खोसलाची हत्या सुपारी देवून करण्यात आली होती. सुपारीची रक्कम अलीकडेच मिळाली. त्यातील हिस्सा मागण्यासाठी आरोपी कारने आले होते. आरोपींनी कदाचित एक राउंड फायर केला. मात्र, गोळी अडकली. दुसरी गोळी कारमध्ये सीट कव्हरवर मिळाली. पोलिसांनी गुन्ह्यात वापरलेली कार, कारमधून दोन पिस्तूल, एक रिव्हाल्वर, दोन जिवंत काडतूस, दोन चाकू जप्त केले. फरार आरोपीचा शोध सुरू आहे.