साखरे यांच्यासाठी शिवसेना गोड! बसपा पदाधिकाऱ्यांसह प्रवेश

नागपूर : बसपाचे माजी प्रदेशाध्यक्ष सुरेश साखरे (Suresh Sakhare) यांनी रविवारी शिवसेना संपर्क प्रमुख आमदार दुष्यंत चतुर्वेदी यांच्या नेतृत्वात शिवसेनेत प्रवेश केला. दोन वर्षांपूर्वी त्यांना बसपातून निलंबित (Suspended in bsp) करण्यात आले होते. अनेक बसपातील पदाधिकारी व कार्यकर्त्यासह त्यांनी सेनेत प्रवेश घेतला. (Suresh-Sakhare-joins-ShivSena)

सिव्हिल लाइन्स येथील आमदार दुष्यंत चतुर्वेदी यांच्या निवासस्थानी त्यांच्या पक्षप्रवेशाचा कार्यक्रम पार पडला. यावेळी सेनेचे महानगरप्रमुख प्रमोद मानमोडे, शहर प्रमुख नितीन तिवारी, दीपक कापसे, शहर संघटक विशाल बरबटे, किशोर पराते, नगरसेविका मंगला गवरे, उपजिल्हा प्रमुख बंडू तळवेकर उपस्थित होते.

आमदार दुष्यंत चतुर्वेदी यांनी त्यांच्याकडे सेनेचा झेंडा सोपविला. यावेळी त्यांच्यासोबत बसपाचे माजी प्रदेश सचिव त्रिभुवनपाल तिवारी, बहुजन विद्यार्थी परिषद महाराष्ट्र प्रदेशचे संयोजक नंदकिशोर इंगोले, बसपा महिला आघाडीच्या माजी शहर अध्यक्षा मंजुळा प्रसाद, माजी उपाध्यक्ष सुभाष गजभिये, उत्तर नागपुरातील बसपा पदाधिकारी शुरूर सिद्दीकी यांच्यासह शेकडो बसपा कार्यकर्त्यांनी त्यांच्या नेतृत्वात सेनेत प्रवेश घेतला.

बसपाचे संस्थापक कांशीराम यांच्यासोबत राजकीय कारकीर्द सुरू करणारे साखरे उत्तम संघटक असून, त्यांनी अनेक राज्यात बसपा प्रभारी म्हणून काम केले. पक्षविरोधी कारवाया केल्याचा ठपका ठेवत त्यांना २०१९ मध्ये बसपातून निलंबित करण्यात आले होते. त्यांनी लोकसभा, विधानसभा निवडणूकही लढविली होती.

उद्धव ठाकरे यांच्या कार्याने प्रभावित

दीड वर्षात मुख्यमंत्री उद्धव ठाकरे यांनी राज्यासाठी केलेल्या कार्याने प्रभावित झालो आहे. साखरे यांच्या संघटन कौशल्याचा लाभ शहर सेनेलाच नव्हे तर राज्यातही होईल.

(Suresh-Sakhare-joins-ShivSena)