अरे बाप रे! आणखी दोघांना कोरोनाची बाधा

नागपूर : नागपूरच्या सतरंजीपुरा येथील कोरोनाच्या बाधेने दगावलेल्या रुग्णाच्या संपर्कातील एका नातेवाईकासह इंडोनेशियातून नागपुरात परतलेली एक महिला कोरोनाबाधित असल्याचा अहवाल मेडिकलच्या प्रयोगशाळेतून पुढे आला आहे. यामुळे प्रशासन हादरले आहे. दर दिवसाला बाधित रुग्णांची संख्या वाढत असून ती आता 27 वर पोहचली.
शनिवारी कोरोनाची बाधा झालेल्यांमध्ये मेयोत 5 एप्रिल रोजी दगावलेल्या सतरंजीपुरातील कोरोनाग्रस्त वृद्धाच्या 53 वर्षीय नातेवाईकाचा समावेश आहे. हा व्यक्ती सरतंजीपुरा येथे आजारी असतांना त्याला भेटायला त्याच्या घरी गेला होता. या रुग्णामुळे सतरंजीपुरातील पहिल्या रुग्णाच्या संपर्कातील विषाणूची लागण झालेल्या रुग्णांची संख्या सात आहे. मुळची चंद्रपूरची महिला इंडोनेशियातून पतीसह नागपूरात परतली होती. ही 52 वर्षीय महिला कोरोना बाधित आहे. या महिलेच्या पतीलाही कोरोनाची लागण झाली होती. मेडिकलमध्ये दाखल करून त्यांच्यावर उपचार सुरू आहेत. त्याचवेळी त्याच्या पत्नीला तपासणीसाठी आणले होते. नमुने तपासले असता, कोरोना असल्याचे अहवालातून स्पष्ट झाले. या दोन रुग्णांमुळे शहरातील कोरोनाग्रस्त रुग्णांची संख्या आता 27 वर पोहचली आहे.

सविस्तर वाचा - यवतमाळ शहरातील या भागात करण्यात आली सीमाबंदी; प्रवेश करण्यास सक्त मनाई
मेयोपाठोपाठ "एम्स'मध्ये प्रतीक्षा यादी
मेयो रुग्णालयातील एक पीसीआर यंत्र बिघडले होते. यामुळे तेथील प्रयोगशाळेत मोठ्या प्रमाणात नमुने तपासणीची प्रतीक्षा यादी तयार झाली होती. नुकतेच 6 एप्रिल रोजी अखिल भारतीय आयुर्विज्ञान संस्थेने (एम्स) प्रयोगशाळा तयार केली. अद्ययावत अशा या प्रयोगशाळेत विषाणूजन्य आजाराची तपासणी सुरू झाली. अल्पावधित कोरोना तपासणीच्या पाचशेवर चाचण्या झाल्या आहेत. वैद्यकीय शिक्षण खात्याने या प्रयोगशाळेवर पश्‍चिम विदर्भातील पाच जिल्हयांतील नमुने तपासणीचा भार टाकला आहे. दरम्यान शुक्रवारी रात्री अचानक अमरावतीमधील शंभर नमुने तपासणीसाठी आले. याशिवाय इतर जिल्ह्यातूनही मोठ्या संख्येने नमुने पोहोचले. एम्समध्ये दर दिवसाला 70 नमुने तपासता येतात. यामुळे एम्समध्येही नमुने तपासणीची प्रतीक्षा यादी वाढत असल्याची माहिती पुढे आली आहे.