वर्धा नदीत बुडून २ युवकांचा मृत्यू

वडनेर : हिंगणघाट तालुक्यातील हिवरा येथील वर्धा नदीत पोहण्यासाठी गेलेले चार युवक पाण्यात बुडाले. त्यांपैकी दोघांना वाचविण्यात नागरिकांना यश आले, दोघांचे मृतदेह बाहेर काढण्यात आले आहे. ही धक्कादायक घटना आज रविवारी (ता. सहा) सायंकाळच्या सुमारास घडली. आज दुपारच्या सुमारास दुचाकीने आजनसरा येथून पिपरी येथील ऋतिक नरेश पोखळे (वय‌ २१), संघर्ष चंदुजी लढे (वय १८), रणजित रामजी धाबर्डे (वय २८) आणि शुभम सुधाकर लढे (वय २६) हे चार मित्र हिवरा येथील वर्धा नदीत पोहायला गेले.

या चौघांना नदीतील पाण्याचा अंदाज आला नसल्याने चार युवक नदीत बुडू लागले. घटनेच्या वेळी असलेल्या लोकांनी धावपळ करून रणजित धाबर्डे आणि शुभम लढे या दोघांना वाचविले. घटनेची माहिती मिळताच हिवरा येथील नागरिकांनी घटनास्थळी धाव घेतली. तसेच, वडनेर पोलिस ठाण्याचे पोलिस निरीक्षक बागडे, पोलिस कर्मचारी प्रशांत वैद्य, आशीष डफ, अमोल खाडे, तुषार इंगळे, गुणवंता चिडाम हेसुद्धा घटनास्थळी पोहोचले. नागरिकांच्या मदतीने शोध घेतला असता ऋतिक पोखळे आणि संघर्ष लढे यांचे मृतदेह नदीबाहेर काढण्यात आले. या घटनेमुळे परिसरात शोककळा पसरली असून सर्वत्र हळहळ व्यक्त होत आहे.