नागपूर : ज्येष्ठ महिन्यात पावसाळ्याच्या तोंडावर येणारा "वटपौर्णिमा' हा महिलांचा सण नावाप्रमाणेच वटवृक्षाशी निगडित आहे. यंदा कोरोनाच्या संकटामुळे वडाच्या झाडाच्या शोधात न जाता घरीच वडाचे रोप लावून त्याचे पूजन करून वटपौर्णिमा साजरी करण्याचा निर्णय बहुतांश सुवासिनींनी घेतला आहे. त्यामुळे दरवर्षी असंख्य वडाच्या झाडांच्या होणाऱ्या कत्तलीला आळा बसणार आहे.
वटपौर्णिमेचे वेध लागताच उरल्यासुरल्या वडांच्या झाडांची कत्तल करून त्याच्या फांद्या विक्रीसाठी बाजारात आणल्या जातात. या फांद्याचे पूजन महिला करतात. सध्या मात्र कोरोनाचे संकट असल्यामुळे महिलांनी एकत्र येत घराबाहेर पडून वटपौर्णिमा साजरी करणे धोक्‍याचे आहे. एकत्रित सण साजरा केल्याने कोरोनाचा धोका संभवतो.
या पार्श्वभूमीवर महिलांनी स्वतःचे आणि कुटुंबाचे आरोग्य लक्षात घेऊन घरीच वडाचे रोप लावून त्याचे पूजन करण्याचे आवाहन पर्यावरणप्रेमींकडून केले जात आहे. त्याला बहुतांश महिलांनी सकारात्मक प्रतिसाद देत घरीच वटपौर्णिमा साजरी करण्याचा निर्णय घेतला आहे. वडाच्या झाडाखाली महिलांनी गर्दी केली, तर सोशल डिस्टन्सिंग पाळणे कठीण होईल. त्यामुळे घरीच वडाचे रोप लावून, अथवा चित्र काढून घरीच वटपौर्णिमा साजरी करावी, असे मत पर्यावरणप्रेमींनी व्यक्त केले आहे.
कोरोनाचा प्रादुर्भाव पाहता परिसरातच वडाचे रोप लावून त्याचे पूजन करण्याचा निर्णय आम्ही सर्व मैत्रिणींनी घेतला आहे. त्यानिमित्ताने मुलांनाही वृक्षारोपण व पर्यावरण संवर्धनाचे महत्त्व जाणून घेता येईल.
-रश्‍मी खोरे, गृहिणी.
दिवसेंदिवस होत असलेल्या पर्यावरणाच्या ऱ्हासामुळे तर वटपौर्णिमेच्या निमित्ताने का होईना, वडाचे पूजन आणि संवर्धन करण्यासाठी पुढाकार घेणे गरजेचे झाले आहे. वडाचे झाडे हे दीर्घकाळ टिकणारे असून आयुर्वेदातही त्याचे अनेक फायदे आहेत.
-रंजना साबळे, गृहिणी.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.