संजय राठोड, भावना गवळींविरोधात शिवसैनिक आक्रमक; बाळासाहेबांचा फोटो काढला

Sanjay Rathod, Bhavana Gawali News यवतमाळ : एकनाथ शिंदे यांनी बंड केल्यानंतर त्यांच्यासोबत अनेक शिवसैनिक गेले. यात यवतमाळचे आमदार संजय राठोड (Sanjay Rathod) यांचाही समावेश होता. त्यांना मंत्रिमंडळात स्थान दिल्यानेही वाद झाला. बंडखोर आमदारांविरुद्धचा रोष अद्याप संपलेला नाही. ते आपापल्या जिल्‍ह्यात परतत असताना वाद होत असल्याचे दिसत आहे. असाच वाद शनिवारी (ता. १३) यवतमाळमध्ये पाहायला मिळाला.

राज्यातील सत्तासंघर्षानंतर शिवसैनिकांकडून बंडखोरांवर कठोर टीका केली जात आहे. त्यांचा प्रत्यय पुन्हा एकदा यवतमाळ जिल्ह्यात पाहायला मिळाला. शनिवारी संजय राठोड हे मंत्री झाल्यानंतर तसेच खासदार भावना गवळी (Bhavana Gawali) यांचे बंडानंतर पहिल्यांदाज जिल्ह्यात आगमन झाले. यावेळी त्यांच्याविरोधात शिवसैनिक आक्रमक झाल्याचे पाहायला मिळाले.

मंत्री संजय राठोड (Sanjay Rathod) यांच्या फलकावर असलेला शिवसेनाप्रमुख बाळासाहेब ठाकरे यांचा फोटो शिवसैनिकांनी काढला. शिवसेनेने अनेक सामान्यांना सत्तेची संधी दिली. असे असतानाही शिवसेनेमुळे (Shiv sena) जे आज मोठे झाले, ते पक्षाला सोडून गेले. शिवसेनेच्या बंडखोर आमदारांच्या या निर्णयामुळे जिल्ह्यातील शिवसैनिक प्रचंड संतापले आहे.

संजय राठोड यांच्या स्वागतासाठी जिल्ह्यात राठोड समर्थकांनी जय्यत तयारी केली आहे. बंडानंतर राठोड यांचे एकप्रकारे शक्तिप्रदर्शन केले. त्यापूर्वी शिवसैनिकांनी स्थानिक दत्त चौकात मंत्री संजय राठोड यांच्या स्वागत फलकावर लावलेला शिवसेनानप्रमुख बाळासाहेब ठाकरे यांचा फोटो काढला. बंडखोरांनी शिवसेनाप्रमुखांचा फोटो न लावता निवडणूक जिंकून दाखवावी असे आव्हान राठोड यांना केले.

महिला शिवसैनिकांनी झळकावले निषेधाचे फलक

‘इडी’च्या प्रकरणात अडकल्यानंतर तब्बल तीन वर्षांनंतर खासदार भावना गवळी (Bhavana Gawali) जिल्ह्यात येत आहे. त्यांच्या विरोधातही महिला शिवसैनिकांनी आंदोलन केले. पक्षांशी गद्दारी करून खासदार भावना गवळी येत असल्याने महिला शिवसैनिकांनी त्यांच्या निषेधाचे फलक झळकावले.