![Shivsena leader prataprao Jadhav sworn in as union minister in modi government Buldhana Raksha Khadse](http://media.assettype.com/esakal%2F2024-06%2F7f950bde-ac13-4bae-bc70-bbc60e541eb5%2F_Shivsena_leader_prataprao_Jadhav_sworn_in_as_union_minister_in_modi_government_Buldhana_Raksha_Khad.jpg?w=480&auto=format%2Ccompress&fit=max)
बुलडाणा, ता. ९ : राष्ट्रमाता जिजाऊंच्या जन्माने पावन झालेल्या बुलढाणा जिल्ह्याला पंतप्रधान नरेंद्र मोदी यांच्या मंत्रिमंडळामध्ये केंद्रीय मंत्री पदाचा बहुमान प्रतापराव जाधव यांच्या रूपाने मिळाला आहे.
प्रतापराव जाधव हे शिवसेनेचे तीन वेळा आमदार एक वेळा राज्यमंत्री आणि 2009 पासून सलग चौथ्यांदा खासदार म्हणून निवडून आलेले आहेत. मेहकर सारख्या ग्रामीण भागात आपली राजकीय कारकीर्द सुरू करून सातत्य मेहनत राजकीय चातुर्य संघटन कौशल्य या बळावर त्यांनी शिवसेनेतील बहुतांश पदांवर यशस्वीरित्या काम केलं आहे.
महाराष्ट्रातील राजकीय घडामोडी नंतर एकनाथ शिंदे यांना प्रतापराव जाधव यांनी समर्थ साथ दिली व जिल्ह्यातील डॉ. संजय रायमुलकर व संजय गायकवाड हे दोन्हीही आमदार शिंदे यांच्या पाठीशी उभे करण्यात प्रतापरावांचा मोलाचा वाटा होता. याचा विचार निश्चितच मंत्रीपदाच्या शर्यतीमध्ये अनेक चेहरे असतानाही प्रतापराव यांची वर्णी लागण्यात झाला आहे. औद्योगिक मागासलेपणाचा शिक्का लागलेल्या बुलडाणा जिल्ह्याला या केंद्रीय मंत्री पदाचा उपयोग होऊन जिल्ह्याच्या पदरी भरघोस काहीतरी पडेल, अशी अपेक्षा जिल्हावासी व्यक्त करीत आहेत.
भौगोलिक दृष्ट्या विचार करता बुलडाणा जिल्ह्याला खासदार प्रतापराव जाधव व खासदार रक्षाताई खडसे यांच्या रूपाने दोन केंद्रीय मंत्रीपदे मिळाली आहेत, असे म्हटल्यास वावगे ठरणार नाही. बुलडाणा जिल्ह्याची विभागणी बुलढाणा व रावेर अशा दोन लोकसभा मतदारसंघांमध्ये झालेली आहे.
जिल्ह्यातील बुलडाणा, चिखली, सिंदखेडराजा, खामगाव, जळगाव जामोद व मेहकर हे पाच विधानसभा मतदारसंघ बुलडाणा लोकसभेमध्ये येतात. मात्र मलकापूर व नांदुरा हे दोन तालुके असलेला मलकापूर विधानसभा मतदारसंघ नजीकच्या रावेरमध्ये येतात. यावेळी रावेरच्या खासदार रक्षाताई खडसे यांना देखील केंद्रीय मंत्रिमंडळात स्थान मिळाले आहे. त्यामुळे बुलडाणा जिल्ह्याला दोन केंद्रीय मंत्रिपदे मिळालेली आहेत, एवढे निश्चित!
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.