सामाजिक बांधिलकी जपून डॉ. भारत लाडे यांनी केले अनाथ मुलांना स्वेटरचे वाटप; अनाथांच्या चेहऱ्यावर फुलले हसू

अर्जुनी मोरगाव (जि. गोंदिया) : जन्मदात्या आईवडिलांचे छत्र हरपून हलाखीचे जीवन जगणाऱ्या अनाथ मुलांच्या मदतीसाठी येथील ग्रामीण रुग्णालयाचे आयुष विभागाचे वैद्यकीय अधिकारी डॉ. भारत लाडे धावून आले. सामाजिक बांधिलकीची जाणीव असलेल्या डॉ. लाडे यांनी मुलीचा पाचवा वाढदिवस तालुक्‍यातील अनाथ मुलांसोबत साजरा केला. त्यांना स्वेटर, अल्पोपाहार, मिठाई व रोख रकमेचे वाटप केले. हे सारे पाहून अनाथ मुलांच्या चेहऱ्यावरचा आनंद ओसंडून वाहत होता.

 
अनाथ तसेच विधवा महिलांच्या मुलांना मदतीचे वाटप बोंडगावदेवी येथील मिलिंद बुद्धविहारात रविवारी (ता. १) करण्यात आले. यावेळी डॉ. भारत लाडे, बाजार समितीचे प्रशासक प्रशांत गाडे, प्राथमिक आरोग्य केंद्राचे वैद्यकीय अधिकारी डॉ. कुंदन कुलसुंगे, प्रदीप जोक्‍यानी, पनपालिया, भाग्यवान फुल्लुके, माजी सैनिक सुनील फुल्लुके उपस्थित होते.

तालुक्‍यातील निमगाव, बोंडगावदेवी, बाक्‍टी, मांडोखाल, धाबेटेकडी, विहीरगाव येथील जन्मदात्यांचे छत्र हिरावून गेल्याने खेळण्या-बाळगण्याच्या वयात निरागस मुलांवर अनाथ होण्याची वेळ आली. सामाजिक बांधिलकीची जाणीव ठेवून बोंडगावेदेवी येथील सामाजिक कार्यकर्ते अमरचंद ठवरे हे त्या मुलांच्या संपर्कात राहून त्यांच्या जीवनमानाचे वास्तव चित्र समाजासमोर मांडत आहेत. अनेक दानदाते त्यांच्या मदतीसाठी पुढे येत आहेत.

जाणून घ्या : धानविक्रीसाठी डिजिटल सात बारा हवा; शेतकऱ्यांना केंद्रावर करावी लागणार प्रतीक्षा

मुलीच्या वाढदिवशी अनाथ मुलांना स्वेटर वाटप

अनाथांची माय म्हणून जिल्ह्यात ओळखल्या जाणाऱ्या प्रा. डॉ. सविता बेदरकर यांच्या सहकाऱ्याने जिल्ह्यातील अनाथ मुलांना अन्नधान्यासह जीवनोपयोगी वस्तूंचा नियमितपणे घरपोच पुरवठा केला जात आहे. समाजात वावरणारे सामान्य, गोरगरीब, वंचित, अनाथांच्या जीवनात आनंद पेरण्यासाठी स्वतः त्याग करण्यात जीवनाचे खरे सार्थक आहे. असे ध्येय मनोमन अंगी बाळगणारे डॉ. भारत लाडे यांनी आपल्या मुलीचा पाचवा वाढदिवस अनाथ मुलांसह साजरा करून २० मुलांना स्वेटर, अल्पोपाहार, मिठाई, रोख रकमेचे वाटप केले.

अनाथांना मायेची ऊब

डॉ. लाडे यांनी अनाथांना लाडू व पेढे भरवून जन्मदात्यांची ऊब दिली. त्यांच्याशी संवाद साधला. प्रशांत गाडे यांनी डॉ. बाबासाहेब आंबेडकर यांचा आदर्श डोळ्यासमोर ठेवून शैक्षणिक प्रगती करा, जन्मदाते सोडून गेले असले; तरी निराश होऊ नका, शिक्षण सोडू नका, स्वतःच्या पायावर उभे राहा, असे मार्गदर्शन केले. संचालन अमरचंद ठवरे यांनी केले. आयोजनासाठी विशाल ठवरे, मंगेश डोये, समीर मेश्राम यांनी सहकार्य केले.

अवश्य वाचा :  विवाहितेची कमाल! जिवंत पतीला मृत दाखवून लाटले शासकीय अनुदान अन् केले दुसरे लग्न

‘मोठे ध्येय गाठण्याचा संकल्प करा’

जीवनात आपल्याला मोठे ध्येय गाठायचे आहे, असा संकल्प ठेवा, स्वतः सक्षम बना, शाळा शिका तुम्हाला अडचण येणार नाही, यासाठी सहकार्य करेन, जन्मदात्याची उणीव भासू देणार नाही, असे सांगत डॉ. लाडे यांनी अनाथांना पालकत्वाची जोड दिली.

(संपादन : दुलिराम रहांगडाले)