शेतकऱ्यांनो! यंदा सोयाबीनच्या बियाण्यांचे भाव भडकणार?

अमरावती : यंदा खुल्या बाजारात सोयाबीनला मिळालेल्या उच्चांकी भावाचा परिणाम आगामी खरीप हंगामावर पडण्याची शक्‍यता आहे. या हंगामात बियाणे चांगलेच महागण्याची शक्‍यता असून त्यावर नियंत्रण ठेवण्यासाठी कृषी विभागाची चांगलीच कसरत होणार आहे. काळाबाजार रोखण्यासाठी पथक नियुक्त करण्यात येणार असल्याचे विभागाने म्हटले आहे.

कमी कालावधीत व कमी खर्चात उत्पादन देणारे म्हणून सोयाबीनला पसंती दिल्या जाते. त्यामुळे गेल्या दीड दशकांत कापूस उत्पादक पट्ट्यात सोयाबीन पेरणीचे क्षेत्र झपाट्याने वाढले आहे. गतवर्षी मॉन्सूनचा अनियमितपणा व अतिपर्जन्य यामुळे सोयाबीनला चांगलाच फटका बसला. उत्पादनाची सरासरी घसरण्यासोबतच प्रतवारीही घसरली. चांगल्या (सुपर) दर्जाच्या सोयाबीनची वानवा गेल्याने खुल्या बाजारात भाव तडकले. त्याचा लाभ सरत्या हंगामातील शेतकऱ्यांना झाला. मात्र, आगामी हंगामात बियाण्यांसाठी वणवण होण्याची व अधिक पैसे मोजण्याची वेळ येणार असल्याचे शक्‍यता कृषी विभागातील अधिकाऱ्यांनी वर्तविली आहे.

हेही वाचा - कोरोनाचे ‘सुपर स्प्रेडर’ बघायचे? चला नागपूरला; उपराजधानीतील बाजारात लोकांचा बेदरकारपणा

गेल्या हंगामात चांगल्या प्रतीचे सोयाबीन सरसकट न विकता काही बियाण्यांसाठी राखून ठेवण्याचे आवाहन येथील जिल्हा अधीक्षक कृषी अधिकारी विजय चवाळे यांनी शेतकऱ्यांना केले होते. फेब्रुवारी व मार्चमध्ये खुल्या बाजारातील सोयाबीनची आवक बघता शक्‍यता कमी आहे. गतवर्षी 75 ते 80 रुपये किलोने बियाणे विकल्या गेले. अतिपावसाने चांगल्या प्रतीचा सोयाबीन कमी झाल्याने यंदा त्या दर्जाच्या बियाण्यांचा तुटवडा जाण्याची शक्‍यता आहे. त्यामुळे उच्च दर्जाच्या सोयाबीनचे दर चढे राहणार आहेत, अशी शक्‍यता कृषी विक्रेत्यांनी वर्तविली आहे. त्यांच्या मते हंगामात चढ्या दराने खरेदीदारांनी सोयाबीन खरेदी केला. त्यामध्ये बियाणे उत्पादक कंपण्याचा समावेश अधिक आहे. ते कमी दरात बियाणे विकणार नाहीत.

हेही वाचा -  अचलपूरची 'शकुंतला' गेली कुठे? गेल्या दोन वर्षांपासून या जीवनवाहिनीची लोकं बघताहेत वाट  

तुटवडा व काळाबाजारावर नियंत्रणाचे आव्हान -
सोयाबीन बियाण्यांची मागणी व गेल्या हंगामातील स्थिती बघता यावर्षी बियाण्यांचा तुटवडा जाण्याची शक्‍यता आहे. किंबहूना ती निर्माण केल्या जाण्याची शक्‍यता आहे. अशा वेळी तुटवडा व काळाबाजार यावर नियंत्रण ठेवण्याचे आव्हान आहे, त्यासाठी स्वतंत्र पथक नियुक्त करण्यात येतील, असे जिल्हा अधीक्षक कृषी अधिकारी विजय चवाळे यांनी सांगितले.