बापरे! घराच्या मागेच लपून होता वाघ, सरपण आणायला जाताच महिलेवर केला हल्ला

ब्रह्मपुरी (चंद्रपूर) : घराच्या मागील भागात ठेवलेले सरपण आणण्यासाठी गेलेल्या महिलेला वाघाने हल्ला करून ठार केले. ही घटना सोमवारी (ता. 7) तालुक्‍यातील चिचगाव येथे सायंकाळी 6 वाजण्याच्या सुमारास घडली. सायत्रा श्रीराम ठेंगरे (वय 50), असे मृत महिलेचे नाव आहे.

हेही वाचा - ऑनलाइन परीक्षेत 'कॉपी'चा महापूर, विद्यापीठाचा दावा फोल

तालुक्‍यातील चिचगाव या गावालगत जंगल आहे. त्यामुळे वन्यप्राण्यांचे येथील नागरिकांना नेहमीच दर्शन होत असते. दररोजच्या स्वयंपाकासाठी वापरात येणारे सरपण अनेकजण जमा करून ठेवत असतात. ठेंगरी कुटुंबीयांनीही घराच्या मागील भागात सरपण ठेवले होते. सायंकाळच्या सुमारास घरामागील सरपण आणण्यासाठी सायत्रा ठेंगरी ही महिला गेली होती. यावेळी अचानक वाघाने हल्ला करून घटनास्थळापासून सुमारे अर्धा किलोमीटर अंतरापर्यंत फरफटत नेले. यात तिचा मृत्यू झाला.

हेही वाचा - कंत्राटदार-ग्रामपंचायत प्रशासनाच्या बिलासाठी चकरा, आता...

सरपण आणण्यासाठी गेलेली महिला परतली नसल्याने कुटुंबीयांनी घरामागे बघितले. मात्र, तेथे ती आढळून आली नाही. त्यामुळे इतरत्र चौकशी केली असता महिलेचा मृतदेह अर्धा किलोमीटर अंतरावरील जंगलात आढळून आला. घटनेची माहिती मिळताच पोलिस घटनास्थळी दाखल झाले.