यवतमाळ : चोरट्यांचा पारा भडकला अन् साहित्याची केली नासधूस

नेर (जि. यवतमाळ) : भर दुपारीच चोरटे घरात शिरतात... घराची झाडाझडती घेतात... किचन, बेडरूम, बैठक आदी खोल्यांची बारकाईने तपासणी करतात...मात्र इतकी मेहनत करुनही हाती काहीच लागले नाही. त्यामुळे चोरट्यांचा तिळपापड झाला आणि मग काय घरातील सर्व साहित्याची नासधूस करूनच त्यांचे समाधान झाले. नेर शहरातील नूरनगरात बुधवारी (ता.१५) घडलेल्या घटनेने चर्चेला उधाण आले आहे.

नूरनगर येथे प्रा. शेख हुसेन शेख हनीफ (वय ४७) यांचे घर आहे. मुलाच्या शिक्षणासाठी त्यांचे उर्वरित कुटुंब अमरावती येथे राहायला गेले आहे. नेहमीप्रमाणे प्राध्यापक शेख हे दुपारी अकरा ते बाराच्या दरम्यान कॉलेजला गेले असता परिसरातील पाळत ठेवून असलेल्या चोरट्याने गेटचे कुलूप तोडून दुपारी घरात प्रवेश केला. घरातील किचनमध्ये ऐवज ठेवला आहे का ? याची त्यांनी झडती घेतली.

बैठकीतही त्यांनी बारकाईने काही मिळते का याची तपासणी केली. यानंतर चोरट्यांनी आपला मोर्चा बेडरूमकडे वळवला. बेडरूममधील सर्व कपाटे, दिवाण आदी उघडून बारकाईने पाहणी केली. मात्र, काहीच मिळाले नाही. गलेलठ्ठ पगार असलेल्या प्राध्यापकाच्या घरात आपल्याला नक्कीच मोठा ऐवज हाती लागेल या आशेने घरात शिरलेल्या चोरट्यांची निराशाच झाली. सायंकाळी प्रा. शेख घरी आल्यावर सर्व साहित्य अस्ताव्यस्त पडलेले दिसले. या प्रकरणी नेर पोलिस ठाण्यात तक्रार दिली असून, अनोळखी चोरट्यांविरुद्घ गुन्हा नोंदविण्यात आला.