महिला अधिकाऱ्यास अडवून विनयभंग; ठार मारण्याची धमकी दिल्याप्रकरणी युवकाविरुद्ध गुन्हा दाखल

अमरावती : औद्योगिक वसाहतीतील एका कंपनीमध्ये नोकरी करणाऱ्या महिला अधिकाऱ्यास अडवून तुझ्यासोबत लग्न करायचे आहे. माझ्यासोबत बोल नं, अशी मागणी युवकाने तिच्यापुढे रेटून धरली. त्या युवकाविरुद्ध राजापेठ ठाण्यात विनयभंग आणि जीवे मारण्याची धमकी दिल्याप्रकरणी गुन्हा दाखल झाला आहे.

अमित देविदास पाडवे (वय ३५, रा. आर्वी, जि. वर्धा), असे पाठलाग करून विनयभंग करणाऱ्याचे नाव असल्याचे पोलिसांनी सांगितले. पीडित युवती नोकरी करीत असलेल्या ठिकाणी अमितचे येणे-जाणे असल्यामुळे त्यांची ओळख झाली. अमितने युवतीचा मोबाईल नंबर मिळविला.

जाणून घ्या : शेतात वाघ असल्याची वनकर्मचाऱ्यांना मिळाली माहिती; शोधकार्य सुरू असताना मधमाशांनी केला हल्ला

मागील सहा महिन्यांपासून सतत पीडितेच्या मोबाईलवर संपर्क साधून सोबत बोलण्याची आग्रही मागणी करीत होता. पीडितेने अमितच्या वर्तणुकीकडे दुर्लक्ष केल्यानंतर ती खूप आवडत असल्याचे सांगून टाकले. सतत बोलत जा, असा आग्रह धरलेल्या अमितला युवतीने समज दिल्यानंतरही त्याच्या वागणुकीत फरक पडला नाही.

युवतीने टाळले त्याला

त्यामुळे युवतीने मोबाईलवर उत्तर देण्याचे टाळले. परंतु मनात घर करून बसलेल्या युवतीसोबत काही झाले तरी संपर्क करायचाच म्हणून त्याने संपर्कासाठी दुसऱ्याही फोनचा वापर केला. अमितकडे दुर्लक्ष करीत असतानाही तो ती राहत असलेल्या ठिकाणीसुद्धा पोहोचला. पुन्हा दोन मिनिटे तरी बोल, असा आग्रह त्याने पीडितेपुढे धरला.

अवश्य वाचा :  अमरावतीतील बाळाचे मृत्यूप्रकरण : बाळाची आई जुन्याच जबाबावर ठाम; हत्येचे रहस्य कायम

पीडितेशी जवळीक साधण्याचा प्रयत्न

पीडितेशी त्याने जवळिक साधण्याचा प्रयत्न केला. फोन न उचलता दुर्लक्ष का करते? असा प्रश्‍न अमितने युवतीपुढे उपस्थित केला. अखेर त्याने बोलण्याचे टाळल्यास स्वत:च्या जिवाचे बरेवाईट करून घेईन, अशी धमकी तिला दिली. पीडितेच्या तक्रारीवरून राजापेठ पोलिसांनी अमित पाडवेविरुद्ध गुन्हा दाखल केला. अमितला सोमवारपर्यंत (ता. सात) अटक झाली नसल्याचे पोलिसांनी सांगितले.

(संपादन  : दुलिराम रहांगडाले)