Women Safety Video: 'धनदौलत कमी दे, पण मुलींच्या अब्रूची हमी दे' स्त्रियांच्या सुरक्षेसाठी थेट गणपती बाप्पालाच विनवणी

छत्रपती संभाजीनगरमधील मुलींनी स्त्रियांच्या सुरक्षेसाठी थेट गणपती बाप्पालाच विनवणी केलीय. बाप्पा धनदौलत कमी दे, पण मुलींच्या अब्रूची हमी दे', 'स्त्रियांवर खूप अत्याचार सुरू आहेत. तू धरतीवर आल्यावर त्या नराधमांना ठार मार,' असे पोस्टकार्डद्वारे छत्रपती संभाजीनगर शहरातील जवळपास २ हजार शाळकरी मुलामुलींनी बाप्पाला साकडे घातले आहे. पत्राच्या एका बाजूला रक्षणाचे आवाहन, तर दुसऱ्या बाजूला अंत:करणातील गणपतीचे सुंदर चित्र साकारले आहे. मुली, महिलांवर दररोज होणाऱ्या अत्याचाराच्या घटनांमुळे शालेय मुलींच्या मनात किती खोलवर भीती दडली आहे, हे या पत्रातून समोर आले. संभाजीनगर शहरातील सिडको एन-६ येथील कुलस्वामिनी प्रतिष्ठान गणेश मंडळाने शाळेत जाऊन पोस्टकार्ड वाटली. मुला-मुलींना त्यावर गणेशाचे चित्र आणि संदेश पाठविण्याचे आवाहन केले होते. शहरातील ३० शाळांतील दोन हजार विद्यार्थ्यांनी पत्र प्रतिष्ठानकडे पाठवले. यातील ५० टक्के मुलींनी समाजात होणाऱ्या अत्याचाराला वाचा फोडली.