मेकअप-बिकअप : कॉन्टॅक्ट लेन्स आणि डोळ्यांचा मेकअप

कॉन्टॅक्ट लेन्स या तशा चष्म्याला पर्याय म्हणून लावल्या जायच्या. मात्र, अलीकडच्या काळात सुंदर दिसण्यासाठीही कॉन्टॅक्ट लेन्स वापरल्या जातात. डोळे हा नाजूक भाग असल्याने कॉन्टॅक्ट लेन्स वापरताना विशेष काळजी घ्यावी लागते. त्याचबरोबर या लेन्स लावल्यानंतर, अनेक जणी डोळ्यांचा मेकअप करावा की नाही या संभ्रमात असतात. आज आपण या लेन्स लावल्यानंतर डोळ्यांच्या मेकअपसाठी कोणती उत्पादने वापरू शकता, हे पाहूया.

• बरेचदा हाताला बारीक कचरा चिकटून असल्याने त्याचे इन्फेक्शन डोळ्यांना व्हायची शक्यता असते. त्यामुळे डोळ्यांमध्ये कॉन्टॅक्ट लेन्स लावण्यापूर्वी हात स्वच्छ धुवून घ्यायला हवेत.

• मेकअप करण्यापूर्वीच लेन्स लावून घ्या. अनेकदा मेकअप केल्यानंतर लेन्स लावल्या जातात; पण असे केल्याने डोळ्यांत कचरा जमा होतो आणि चुरचुरते. त्यामुळे कधीही मेकअप करण्यापूर्वीच लेन्स लावाव्यात.

• लेन्स लावल्यानंतर डोळ्यांचा मेकअप करताना सावधानता बाळगा. डोळे चोळले जाणार नाहीत, जास्त दाब दिला जाणार नाही याची दक्षता घ्या.

• आयलायनर ‘वॉटरलाइन’वरच लावले गेले पाहिजे. कधीकधी आयलायनर लावताना ते ‘वॉटरलाइन’च्या आत सरकले जाते. असे होता कामा नये, यासाठी विशेष काळजी घ्यायला हवी.

• कॉन्टॅक्ट लेन्स वापरणार असल्यास पावडर आयशॅडोऐवजी क्रीम आयशॅडो लावायला हवा.

• मस्कारा लावताना विशेष काळजी घ्यायला हवी. डोळ्यांच्या फार जवळ धरून पापण्यांना मस्कारा लावू नये. शक्य तितक्या लांब ब्रश धरून मस्कारा लावावा. ‘लॅश बिल्डिंग मस्काऱ्या’पासून दूरच राहावे.