Paris Olympic शेवटची स्पर्धा! दोन वेळचा सुवर्णपदक विजेता अँडी मरेचा टेनिसला अलविदा

Andy Murray Retirement from Tennis: ब्रिटनचा स्टार टेनिसपटू अँडी मरे याने निवृत्तीची घोषणा केली आहे. मरेने स्पष्ट केले की आगामी पॅरिस ऑलिम्पिक ही त्याच्या कारकिर्दीतील अखेरची स्पर्धा असणार आहे.

३७ वर्षीय मरे पॅरिस ऑलिम्पिकमध्ये एकेरी आणि दुहेरी अशा दोन्ही प्रकारात सामील होणार आहे. त्याने सोशल मीडियावर पोस्ट करत तो पॅरिस ऑलिम्पिक २०२४ नंतर निवृत्त होणार असल्याचे सांगितले आहे.

त्याने त्याच्या पोस्टमध्ये लिहिले आहे की 'पॅरिसमध्ये मी माझ्या कारकीर्दीतील अखेरची टेनिस स्पर्धा खेळण्यासाठी आलो आहे. ग्रेट ब्रिटनसाठी खेळणे, हे माझ्यासाठी आत्तापर्यंतचे सर्वात अविस्मरणीय आठवडे आहेत. आता अखेरच्यावेळीही मला ग्रेट ब्रिटनकडून खेळायला मिळणे, हा मोठा सन्मान आहे.'

अँडी मरे पाचव्यांदा ऑलिम्पिक स्पर्धेत सहभागी होत आहे. सर्वात आधी तो २००८ साली बिजिंग ऑलिम्पिकमध्ये सहभागी झाला होता. परंतु, त्या स्पर्धेत त्याला पहिल्याच फेरीत पराभूत व्हावं लागलं होतं.

पण नंतर त्याने २०१२ लंडन ऑलिम्पिक आणि २०१६ रिओ ऑलिम्पिक स्पर्धेत एकेरीमध्ये सुवर्ण पदक जिंकले. त्यामुळे तो एकमेव पुरुष टेनिसपटू आहे, ज्याने एकेरीत दोन ऑलिम्पिक सुवर्णपदके जिंकली आहेत.

अँडी मरेने त्याच्या कारकीर्दीत २०१३ आणि २०१६ साली विम्बल्डन आणि २०१२ साली अमेरिकन ओपन ही ग्रँडस्लॅम विजेतीपदं मिळवली आहेत. मात्र २०१९ साली त्याला मोठ्या शस्त्रक्रियेला सामोरे जावे लागले. त्यानंतर मात्र, त्याला मोठी कामगिरी करता आली नाही. त्याला पाठीच्या दुखापतीमुळे यंदाच्या विम्बल्डनमध्येही फार काही करता आले नाही.