Imane Khelif : महिला बॉक्सिंगमध्ये वादग्रस्त ठरलेल्या इमाने खलिफचा 'गोल्ड'न पंच, अश्रू अनावर
Algerian boxer Imane Khelif gold medal : अल्जेरियन बॉक्सर इमाने खलिफने महिलांच्या ६६ किलो वजनी गटाच्या फायनलमध्ये चीनच्या लियूचा पराभव करून गोल्ड मेडल जिंकले. खलिफची ऑलिम्पिक स्पर्धेतील सुरुवात वादाने झाली होती आणि तो ती नसून तो असल्याचा आरोप केला गेला. ज्या खलिफला आंतरराष्ट्रीय बॉक्सिंग असोसिएशनने पुरुष असल्याच्या कारणावरून निलंबित केले होते, तो ऑलिम्पिकमध्ये महिलांच्या गटातून खेळल्याने वाद झाला होता. पण, ऑलिम्पिक समितीने खेळण्याची परवानगी दिली आणि खलिफने सुवर्णपदक जिंकले. सुवर्णपदक जिंकल्यावर खलिफचे डोळे पाणावले.
खलिफने महिला बॉक्सिंग welterweight गटाच्या पहिल्या लढतीत इटलीच्या अँजेला कॅरिनीचा ४६ सेकंदात पराभव केला. खलिफने जोरात पंच मारल्याने कॅरिनीच्या नाकाला जबर मार बसला आणि ती प्राथमिक उपचार घेण्यासाठी तिच्या प्रशिक्षकाकडे गेली. तिने तिचे हेडगिअर सरळ केले आणि पुन्हा लढण्यासाठी आली, परंतु ती पुन्हा कॉर्नरवर परतली आणि सामन्यातून माघार घेतली.
महिलांच्या स्पर्धेत बायोलॉजिकली पुरुष असलेला खेळाडू खेळल्याचा दावा केला गेला. महिलांच्या स्पर्धांमध्ये XY गुणसूत्र असलेल्या या खेळाडूला आंतरराष्ट्रीय बॉक्सिंग असोसिएशन (IBA) २०२३च्या जागतिक चॅम्पियनशिपमध्ये सुवर्णपदकाच्या सामन्यापूर्वी अपात्र ठरवले होते आणि तेव्हापासून २५ वर्षीय खलिफ चर्चेत आहे.
“मी खूप आनंदी आहे. आठ वर्षांपूर्वी पाहिलेलं स्वप्न खरं झालं आणि आता ऑलिम्पिक चॅम्पियन आणि सुवर्णपदक विजेती आहे. मी आठ वर्षे खूप कष्ट घेतले,” असेही खलिफ म्हणाली.