Champions Trophy 2025 BCCI vs PCB : भारत आणि पाकिस्तान यांच्यातल्या वादात आंतरराष्ट्रीय क्रिकेट परिषद ( ICC) वाईट पद्धतीने अडकल्याचे दिसतेय. पाकिस्तानला २०२५च्या चॅम्पियन्स ट्रॉफीचे यजमानपद जेव्हा जाहीर झाले, तेव्हाच गोंधळ उडणार हे स्पष्ट झाले होते. भारतीय संघ चॅम्पियन्स ट्रॉफीसाठी पाकिस्तानात जाणार नाही, हे स्पष्टच होते. केंद्र सरकार त्याला कधीच परवानगी देणार नाही आणि तसेच घडले. BCCI ने आयसीसीला तसे कळवले आणि नंतर आयसीसीने ई मेल करून पाकिस्तान क्रिकेट बोर्डाला त्याची माहिती दिली. त्यानंतर PCB ने संताप व्यक्त करून आम्ही आमच्या सरकारशी चर्चा करू, असा आव् आणला. त्यांनी आयसीसीला मेल करून भारत का येत नाही, त्याचं कारण सांगा असे प्रश्न विचारले. त्यामुळे आता वाद आणखी चिघळणार असल्याचे संकेत आहेत.