Paris Olympic 2024: आपली यारी, लय भारी! भारतीय हॉकीपटूंचं ऑलिम्पिक मेडल एकमेकांना घालत अनोखं सेलिब्रेशन, Video एकदा पाहाच

India Hockey Team Celebration after Bronze Medal: पॅरिस ऑलिम्पिक २०२४ स्पर्धेत गुरुवार (८ ऑगस्ट) भारतीय हॉकी संघासाठी ऐतिहासिक ठरला. भारतीय हॉकी संघाने गुरुवारी कांस्य पदकाच्या लढतीत स्पेनचा २-१ अशा गोल फरकाने पराभव केला. त्यामुळे भारतीय संघाने कांस्य पदकाला गवसणी घातली.

हे भारतीय संघाचे विक्रमी १३ वे ऑलिम्पिक पदक ठरले, तर भारताने तब्बल ५२ वर्षांनंतर सलग दोन ऑलिम्पिक पदक जिंकले. यापूर्वी भारताने १९४८ ते १९७२ दरम्यान सलग ऑलिम्पिक पदके जिंकली होती. त्यानंतर १९८० साली भारताने ११ वे पदक जिंकले.

यानंतर तब्बल ४० वर्षे भारताला १२ व्या पदकाची वाट पाहावी लागली. २०२१ मध्ये टोकियोत झालेल्या ऑलिम्पिकमध्ये भारताने कांस्यपदकाची कमाई केली. यानंतर आता पुन्हा भारताने यंदा देखील ऑलिम्पिक पदक आपल्या नावावर केले आहे.

दरम्यान, गुरुवारी रात्री पुरुषांच्या हॉकीमध्ये पदक विजेत्यांचा गौरव करण्यात आला. पॅरिस ऑलिम्पिकमध्ये नेदरलँड्सने सुवर्ण आणि जर्मनीने रौप्य पदक पटकावले. यादरम्यान, कांस्य पदक विजेता भारतीय संघ जेव्हा पोडियमवर उभा राहिला, तेव्हा ते एकमेकांचा हात धरून तो उंचावून पोडियमवर आले.

यानंतर जेव्हा त्यांच्या गळात पदक घालण्यात आले. पदक घातल्यानंतर मात्र एक वेगळं, पण सुंदर दृश्य सर्वांना पाहायला मिळालं.

भारतीय संघाचा कर्णधार हरमनप्रीत सिंगने या स्पर्धेनंतर निवृत्ती घेतलेला गोलकीपर पीआर श्रीजेशच्या गळात आपलं पदक घातलं, तर पीआर श्रीजेशनेही त्याच्या गळ्यातलं पदक हरमनप्रीतच्या गळ्यात घातलं. त्यानंतर संघातील अन्य काही खेळाडूंनीही तशीच कृती केली. या अनोख्या सेलिब्रेशनचे सध्या कौतुक होत आहे.

विजय पीआर श्रीजेशला समर्पित

भारतीय संघाने हे कांस्य पदक पीआर श्रीजेशला समर्पित केले आहे. जवळपास दोन दशके श्रीजेशने भारतीय संघासाठी गोलकीपर म्हणून योगदान दिले आहे. त्याने अनेकदा भारताच्या विजयात महत्त्वाचा वाटा उचलला. तो भारताच्या हॉकी संघाची अभेद्य भिंत म्हणूनही ओळखला जातो.

पॅरिस ऑलिम्पिकमध्येही त्याने चांगला बचाव केला होता. अगदी अंतिम सामन्यातही त्याने केलेला बचाव भारतासाठी महत्त्वाचा ठरला होता. दरम्यान, त्याने पॅरिस ऑलिम्पिक सुरू होण्यापूर्वीच घोषणा केली होती की ही स्पर्धा त्याची अखेरची आंतरराष्ट्रीय स्पर्धा असेल. त्यामुळे आता कांस्य पदकाच्या विजयासह त्याने गोलपोस्टला अलविदा म्हटले आहे.