Paris Olympic 2024 : धूम्रपान केल्यामुळे १९ वर्षीय स्टार खेळाडूची संघातून हकालपट्टी!

Paris Olympic 2024 : पॅरिस ऑलिंपिक स्पर्धा सुरू होण्यापूर्वीच जपानच्या कलात्मक जिम्नॅस्टिक संघाला मोठा धक्का बसला आहे. १९ वर्षीय कर्णधार शाको मियाताने धूम्रपान केल्यामुळे तिची संघातून हकालपट्टी करण्यात आली आहे. जपानच्या जिम्नॅस्टिक संघटनेने ही माहिती जाहीर केली.

जपानच्या कलात्मक जिम्नॅस्टिक संघाचे सराव शिबिर मोनाको येथे सुरू आहे. तेथे शाको मियाता धूम्रपान करत होती. तिच्यावर तत्काळ कारवाई करण्यात आली. परिणामी तिला सराव शिबिर सोडून मायदेशी परतावे लागले. जपानमध्ये आता या प्रकाराची सविस्तर चौकशी करण्यात येणार आहे.

१९६४ मध्ये टोकियोत झालेल्या ऑलिंपिक स्पर्धेत जपानने कलात्मक जिम्नॅस्टिकचे सुवर्णपदक जिंकले होते. त्यानंतर आता पॅरिसमधील स्पर्धेत पुन्हा तीच कामगिरी करण्यासाठी जपानचा संघ चांगली तयारी करत आहे; पण स्पर्धेत सहभागी होण्याअगोदरच त्यांच्यासाठी हा धक्का आहे.

मियाती ही उत्तम जिम्नॅस्ट असल्याचे सांगण्यात येत आहे. जपानमधील चाचणी स्पर्धेत लक्षवेधक कामगिरी केल्यामुळे तिची संघात निवड झाली. एवढेच नव्हे, तर तिच्याकडे संघाचे नेतृत्वही देण्यात आले होते.

कलात्मक जिम्नॅस्टिक हा प्रकार चांगलाच लोकप्रिय असतो. या ऑलिंपिक स्पर्धेत जिम्नॅस्टिकच्या स्पर्धा शर्यती २७ जुलै ते ५ ऑगस्टदरम्यान होणार आहेत.