India Hockey Bronze Medal: भारताच्या प्रत्येक हॉकीपटूच्या खात्यात १५ लाख जमा होणार; वाचा कोणी केली घोषणा

Paris Olympic 2024 Hockey India prize Money : भारतीय पुरुष हॉकी संघाने स्पेनविरुद्धचा सामना २-१ असा जिंकून पॅरिस ऑलिम्पिक स्पर्धेतील कांस्यपदक नावावर केले. ५२ वर्षांनंतर भारताने ऑलिम्पिकमध्ये सलग दोन पदकं नावावर केली. भारतीय पुरुष हॉकी संघाच्या ऐतिहासिक कामगिरीनंतर पंतप्रधान नरेंद्र मोदी यांच्यासह सचिन तेंडुलकर अशा अनेक सेलेब्रिटींनीही कौतुक केले. आता हॉकी संघातील प्रत्येक खेळाडूला १५ लाख रुपये मिळणार आहेत.

भारत-स्पेन यांच्यातल्या सामन्यात पहिल्या १५ मिनिटांत दोन्ही संघांनी एकमेकांना टक्कर दिली. पण, स्पेनने १८व्या मिनिटाला मार्क मिरालेसच्या गोलच्या जोरावर आघाडी घेतली. त्याला ३०व्या मिनिटाला हरमनप्रीत सिंगने पेनल्टी कॉर्नरवर गोल करून उत्तर दिले. ३३व्या मिनिटाला हरमनप्रीतने आणखी एक गोल करून भारताला २-१ अशी आघाडी मिळवून दिली आणि शेवटच्या टप्प्यापर्यंत ती कायम राखून विजय पक्का केला.

भारतीय पुरूष हॉकी संघाने १९२८ ते १९५६ अशी सहा सुवर्णपदकं जिंकली होती. १९६०च्या रोम ऑलिम्पिकमध्ये हॉकी संघाला रौप्यपदकावर समाधान मानावे लागले होते. त्यानंतर १९६४ व १९८० मध्ये भारताने पुन्हा सुवर्ण कामगिरी केली. १९६८, १९७२ मध्ये भारताला कांस्यपदकावर समाधान मानावे लागले होते. त्यानंतर २०२० व २०२४ अशी सलग दोन कांस्यपदकं जिंकून भारतीय संघाने ५२ वर्षांपूर्वीच्या कामगिरीची पुनरावृत्ती केली.

प्रत्येकी १५ लाख...

हॉकी इंडियाने संघाच्या ऐतिहासिक कामगिरीनंतर प्रत्येक खेळाडूला १५ लाख आणि सपोर्ट स्टाफच्या सदस्याला प्रत्येकी ७.५ लाख रुपये जाहीर केले आहे.

स्पर्धेतील प्रवास...

भारताने ब गटात ५ सामन्यांत ३ विजय मिळवले आणि प्रत्येकी १ सामन्यात हार व ड्रॉ असा निकाल लावला. भारताने उपांत्यपूर्व फेरीत रोमहर्षक लढतीत ग्रेट ब्रिटनवर पेनल्टी शूटऑऊटवर विजय मिळवला. पण, जर्मनीने उपांत्य फेरीत ३-२ अशा विजयासह भारताचे सुवर्ण स्वप्न भंग केले. सामन्याच्या अगदी शेवटच्या सेकंदात भारताला बरोबरीचा गोल करण्याची संधी मिळालेली, परंतु ती थोडक्यात गमावली. India vs Spain Hockey