India at Paris Olympic 2024 : ही काय फालतुगिरी! हरायचंच होतं मग भारतीय जोडीला बाहेर का केले?

Paris Olympic 2024 Badminton update: पॅरिस ऑलिम्पिक स्पर्धेतील गुरुवारचा दिवस भारतीयांच्या स्वप्नांचा चुराडा करणारा ठरला. स्टार खेळाडू पी व्ही सिंधू हिचा पराभव हा सर्वांसाठी मोठा धक्का होता. तत्पूर्वी यंदाच्या ऑलिम्पिक स्पर्धेत पदक निश्चित जिंकतील अशी सात्विक साईराज रँकीरेड्डी व चिराग शेट्टी ही जोडी पण हरली. लक्ष्य सेनने आगेकूच केली, परंतु त्याने भारताच्याच एच एस प्रणॉयचा पराभव केला.

भारताच्या पुरुष दुहेरी गटात खेळणारी जोडी सात्विक व चिराग यांना काल उपांत्य फेरीत प्रवेश करता आला नाही. सात्विक व चिराग जोडीने पहिला गेम १७ मिनिटांत २१-१३ असा जिंकला होता, परंतु मलेशियन जोडी चिआ आरोन व सोह वूई यिक यांनी चांगले पुनरागमन केले. त्यांनी दुसऱ्या गेममध्ये चुरशीची टक्कर देताना २१-१४ अशी बाजी मारली आणि मॅच १-१ अशी बरोबरीत आली. तिसऱ्या गेममध्ये दोन्ही देशांच्या खेळाडूंकडून कडवी टक्कर पाहायला मिळाली. पण, मलेशियन जोडीने २१-१६ असा गेम जिंकून भारतीय खेळाडूंचे आव्हान संपुष्टात आणले.

हराचेच होते मग...

भारतीय जोडीला उपांत्य फेरीत जाण्यापासून रोखणाऱ्या मलेशियन जोडीला पराभवाचा सामना करावा लागला. चिआ आरोन व सोह वूई यिक यांना जागतिक क्रमवारीत अव्वल स्थानावर असलेल्या चीनच्या लिआंग वेई केंग व वाँग चँग यांच्याकडून १-२ असा पराभव पत्करावा लागला. चिनी जोडीने पहिला गेम २१-१९ असा जिंकला. पण, मलेशियन जोडीने २१-१५ अशा विजयासह पुनरागमन केले. अखेरच्या गेममध्ये कडवी टक्कर पाहायला मिळाली, परंतु चिनी जोडी २१-१७ अशी वरचढ ठरली. त्यामुळे मलेशियन जोडीला कांस्यपदकाच्या लढतीसाठी खेळावे लागणार आहे. मलेशियन जोडीच्या पराभवामुळे हरायचंच होतं मग भारतीय जोडीला का बाहेर केले, असा सवाल चाहते करताना दिसत आहेत.

बॅडमिंटनमध्ये पुरुष एकेरीच्या उप उपांत्यपूर्व फेरीच्या सामन्यात लक्ष्य सेन व एच एस प्रणॉय हे भारतीय खेळाडू समोरासमोर होते. लक्ष्यने २१-१२ व २१-६ असा विजय मिळवून उपांत्यपूर्व फेरीत प्रवेश केला.