India Paris Olympic 2024: हसावं की रडावं! भारत जिंकलाही, हरलाही; Lakshya Sen कडून सहकाऱ्याचा पराभव

Lakshya Sen vs hs Prannoy at Paris Olympic 2024 Live Update: पॅरिस ऑलिम्पिक स्पर्धेत आज भारतासाठीचे पदकाचे दोन दावेदार बाहेर पडले... बॉक्सिंगमध्ये निखत जरीनचा पराभव धक्का देणारा होता... त्या बॅडमिंटनमध्ये फॉर्मात असलेली सात्विकसाईराज रँकीरेड्डी व चिराग शेट्टी यांना संघर्ष करूनही उपांत्यपूर्व फेरीत गाशा गुंडाळावा लागला. पुरुष एकेरीत दोन भारतीय खेळाडू समोरासमोर होते आणि त्यात लक्ष्य सेनने बाजी मारली.

सात्विक व चिराग कडवी झुंज

भारताच्या पुरुष दुहेरी गटात खेळणारी जोडी सात्विकसाईराज रँकीरेड्डी व चिराग शेट्टी यांना उपांत्य फेरीत प्रवेश करता आला नाही. सात्विक व चिराग जोडीने पहिला गेम १७ मिनिटांत २१-१३ असा जिंकल्यानंतर दुसऱ्या गेममध्ये मलेशियन जोडी चिआ आरोन व सोह वूई यिक यांनी चांगले पुनरागमन केले. मलेशियन जोडीने सलग सहा गुण घेताना हा गेम २१-१४ असा जिंकला. तिसऱ्या गेममध्ये काँटे की टक्कर पाहायला मिळाली आणि मलेशियन जोडीने सात्विक-चिराग यांना कोर्टवर नाचवले. पण, भारतीय जोडीनेही विजयासाठी प्रचंड मेहनत घेतली, परंतु मलेशियन जोडीने २१-१६ असा गेम जिंकून भारतीय खेळाडूंचे आव्हान संपुष्टात आणले.

पुरुष एकेरीत भारत वि. भारत

बॅडमिंटनमध्ये पुरुष एकेरीच्या उप उपांत्यपूर्व फेरीच्या सामन्यात लक्ष्य सेन व एच एस प्रणॉय हे भारतीय खेळाडू समोरासमोर होते. त्यामुळे एक भारतीय स्पर्धेबाहेर जाईल हे पक्कं होतं. लक्ष्य सेनने पहिला गेम २१-१२ असा जिंकून त्याचा फॉर्म कायम राखला. दुसऱ्या गेममध्ये लक्ष्यने १४-४ अशी मजबूत आघाडी घेताना विजयाच्या दिशेने कूच केले. लक्ष्याने २१-६ असा गेम घेताना उपांत्यपूर्व फेरीत प्रवेश केला.

निराशा, निराशा अन् निराशा...

पुरुषांच्या २० किमी चालण्याच्या शर्यतीत भारताच्या विकास सिंग ( १:२२:३६ मि.), परमजीत सिंग बिस्त ( १:२३:४८ मि.) यांना अनुक्रमे ३० व ३७ व्या क्रमांकावर समाधान मानावे लागले. आकाशदीप सिंगला शर्यत पूर्ण करता आली नाही. महिलांच्या २० किमी चालण्याच्या शर्यतीत प्रियांकाला ४१ व्या स्थानावर राहिली.

बॉक्सिंगमध्ये निखत जरीनला अव्वल मानांकित वू यू ( चीन) कडून ०-५ अशी हार मानावी लागल्याने पदकाच्या शर्यतीतून ती बाद झाली आहे. तेच तिरंदाजीत चीनच्या काओ वेनचाओने ६-० अशा फरकाने प्रविण जाधवचा पराभव केला.