India at Paris Olympics 2024 Live - ''कृपया माझ्यावर रागवू नका!'' भारतीयांना असं का म्हणतेय मनु भाकर?

Manu Bhaker Coach in Paris Olympic 2024 - पॅरिस ऑलिम्पिक स्पर्धेत भारताची २२ वर्षीय नेमबाज मनु भाकर हिने ऐतिहासिक कामगिरी केली. मनु भाकरने १० मीटर एअर पिस्तुल वैयक्तिक आणि १० मीटर एअर पिस्तुल मिश्र गटात ( सरबजोत सिंग) अशी दोन कांस्यपदकं नावावर केली. स्वातंत्र्य भारतानंतर एकाच ऑलिम्पिक स्पर्धेत दोन पदकं जिंकणारी मनु ही पहिली भारतीय खेळाडू आहे. या दोन पदकानंतर मनुने आनंद व्यक्त केला, परंतु त्याचवेळी तिने भारतीयांना ''माझ्यावर रागवू नका'', असं आवाहन करावं लागलं.

मनु भाकर आणि सरबजोत सिंग यांनी १० मीटर एअर पिस्तुल मिश्र गटाच्या कांस्यपदकाच्या लढतीत दक्षिण कोरियाच्या खेळाडूंवर १६-१० असे पराभूत केले. सुशील कुमार ( कुस्ती) व पी व्ही सिंधू ( बॅडमिंटन ) यांच्यानंतर दोन ऑलिम्पिक पदक जिंकणारी मनु भाकर ही तिसरी भारतीय खेळाडू ठरली. पण, सुशील व सिंधू यांनी दोन वेगवेगळ्या ऑलिम्पिक स्पर्धेत पदक जिंकले आहेत. मनुने एकाच ऑलिम्पिकमध्ये हा पराक्रम केला.

१९०० मध्ये नॉर्मन प्रिचर्ड यांनी भारताचे प्रतिनिधित्व करताना मैदानी स्पर्धेत दोन रौप्यपदकं जिंकली होती. पण, ही पदकं भारताची की ग्रेट ब्रिटनची असा वाद वर्षानुवर्षे सुरू आहे. मात्र, स्वातंत्र्यानंतर भारताला एकाच ऑलिम्पिकमध्ये दोन पदकं जिंकून देणारी मनु ही पहिलीच खेळाडू ठरली. आता तिला आणखी एक पदक जिंकण्याची संधी आहे. मनु २५ मीटर पिस्तुल गटात सहभाग घेणार आहे आणि २ ऑगस्टला याची पात्रता फेरी पार पडणार आहे.

दरम्यान, आज कांस्यपदक जिंकल्यानंतर मनु भाकर म्हणाली, मला खूप अभिमान वाटतोय... मी ही ऐतिहासिक कामगिरी करू शकले, याचा आनंद आहे. हे सर्व तुम्हा सर्वांच्या आशीर्वाद अन् प्रेमाशिवाय शक्य झालं नसतं. आणखी एक गटात खेळायचे आहे, पण त्यात जिंकले नाही तर कृपया माझ्यावर रागवू नका...