Olympic 2024 : पॅरिस ऑलिम्पिकच्या उद्घाटन सोहळ्यात गोंधळ! 'या' खेळाडूंना परेडमध्ये मिळाली नाही एन्ट्री...

Paris Olympic 2024 : प्रचंड उत्सुकता लागून राहिलेल्या पॅरिस ऑलिंपिक स्पर्धेचे शानदार उद्‌घाटन झाले. या समारंभाच्या काही तास अगोदर हायस्पिड रेल्वे नेटवर्कवर हल्ला करून दहशतवादाचा इशारा देण्यात आला होता; परंतु त्याचा उद्‌घाटन सोहळ्यावर काहीच परिणाम झाला नाही.

खुल्या आसमंतात झालेला हा उद्‌घाटन सोहळा ऑलिंपिकच्या इतिहासातील ऐतिहासिक ठरला. सीन नदीच्या तीरावर झालेला हा सोहळा डोळ्याचे पारणे फेडणारा होता. ढगाळलेले आकाश आणि पावसाच्या हलक्या सरी पडत असल्या तरी सोहळ्याचा उत्साह तसूभरही कमी झाला नव्हता.

फुटबॉल सुपरस्टार झिनेदिन झिदान क्रीडाज्योत मेट्रोतून घेऊन आला आणि तेथूनच सोहळ्यातील ज्योतीचा प्रवास सुरू झाला. ८५ बोटींतून १० हजारांहून अधिक खेळाडू त्यांच्या त्यांच्या देशांचे प्रतिनिधीत्व करत होते. त्या सर्वांसाठी हा अभूतपूर्व अनुभव होता. पण यावेळी काही खेळाडूंना बोटीत बसण्यापासूनही रोखण्यात आले.

परेडमध्ये ग्रीक संघ प्रथम आला, कारण या देशात ऑलिम्पिक खेळला सुरू झाली होती. त्याच वेळी, फ्रान्स यजमान असल्यामुळे शेवटी आला. पण यावेळीत नायजेरियन संघ चर्चेत राहिला. अहवालानुसार, पॅरिस ऑलिम्पिकच्या उद्घाटन समारंभासाठी नायजेरियन महिला बास्केटबॉल संघाला डेलिगेशन बोटमध्ये बसण्याची परवानगी नव्हती.

वृत्तानुसार, नायजेरियन महिला बास्केटबॉल संघाला नायजेरियन अधिकाऱ्यांनी बोटीत चढण्यापासून रोखले होते. पण आता यामागचे कारणही समोर आले आहे. खरंतर, बोटीवर खूप खेळाडू असल्यामुळे नायजेरियन महिला बास्केटबॉल संघ आणि त्यांच्या प्रशिक्षकाला बोटीवर एन्ट्री मिळाली नाही.

आत्तापर्यंत ऑलिंपिकचे उद्‌घाटन सोहळे बंदिस्त स्टेडियममध्ये झाले होते, पण पॅरिसमधील या सोहळ्याला कोणत्याही मर्यादा नव्हत्या. अख्खा आसमंत जणू त्यांनी व्यापला असल्याचे जाणवत होते. बोटीतून खेळाडूंच्या संचलनाची सुरुवात अर्थात पहिलेवहिले ऑलिंपिक झालेल्या ग्रीस देशाच्या खेळाडूंकडून झाले. खेळाडूंच्या संख्येनुसार बोटींचे आकार होते. त्यामुळे काही बोटी तर फार मोठ्या होत्या.