Paris Olympic 2024 : आली खेळ घटी समीप... सीन नदीच्या तीरावर होणाऱ्या पॅरिस ऑलिंपिक उद्घाटनाची उत्सुकता

पॅरिस : संपूर्ण जगाला वेध लागलेल्या पॅरिस ऑलिंपिकचे उद्घाटन आता काही तासांवर आले आहे. आतापर्यंत झाला नसेल, असा उद्घाटन सोहळा उद्या सीन नदीच्या तीरावर होणार आहे. खुल्या आसमंतात होणारा हा सोहळा भव्यदिव्य आणि जगावेगळा करण्याचा घाट ऑलिंपिक समिती आणि फ्रान्स सरकारने घातला आहे. आतापर्यंतचे सर्व उद्घाटन सोहळे बंदिस्त स्टेडियममध्ये झाले होते; पण उद्याचा सोहळा इतिहास घडवेल, असे सांगितले जात आहे.

ऑलिंपिकचे महत्त्व आणि फ्रान्सची संस्कृती उद्घाटन सोहळ्यातील काही कार्यक्रमातून दाखवण्यात येणार आहे. सीन नदीच्या तिरावर प्रेक्षकांची सोय करण्यात येणार आहे आणि अर्थात सायंकाळ झाल्यावर विद्युत प्रकाशझोताची आतषबाजी लक्ष वेधून घेणारी असेल.

तरंगते संचलन

एरव्ही स्टेडियमध्ये होणाऱ्या उद्घाटन सोहळ्यात सहभागी देशांच्या खेळाडूंचे संचलन प्रतिष्ठेचे, सन्मानाचे आणि आकर्षणाचेही असते. यावेळी सीन नदीवर आठ किमी अंतरावर बोटीतून खेळाडूंचे संचलन होणार आहे. त्यासाठी १०० बोटी असणार आहेत आणि त्यात जवळपास १० हजार खेळाडू सहभागी होणार आहेत.

जगावेगळा होणारा हा उद्घाटन सोहळा याची देही याची डोळा पाहण्यासाठी तीन लाख लोकांना नदीच्या तीरावर प्रवेश देण्यात येणार होता; परंतु सुरक्षिततेच्या कारणावरून ही संख्या आता निम्म्यावर करण्यात आली आहे.

पावसाचा व्यत्यय येणार ?

नदीच्या तिरावर होणाऱ्या उद्घाटन सोहळ्यासाठी हवामानाचीही साथ मिळणे आवश्यक आहे, परंतु `वेदर डॉट कॉम`ने वर्तवलेल्या अंदाजानुसार उद्या सायंकाळी हलक्या पावसाची ५० टक्के शक्यता वर्तवण्यात आली आहे. तसेच आकाश अंशतः ढगाळ असणार आहे. मध्यम स्वरूपाचे वारे वाहणार असल्याने त्याचा त्रास होणार नाही.

सांस्कृतिक कार्यक्रमात कोण?

सहभागी होणार, याची माहिती उघड करण्यात आली नाही; परंतु लेडी गागा, सेलिन डायन, टेलर स्विफ्ट हे कलाकार आपली अदाकारी सादर करणार असल्याची माहिती मिळत आहे. फ्रान्सचे जगप्रसिद्ध गायक अया नाकामुरा हिच्याही गाण्यांचा कार्यकम होणार असल्याचे समजते.

दृष्टिक्षेपात

• सीन नदीच्या तीरावर होणार उद्घाटन

• १० हजार खेळाडूंचा संचलनात सहभाग

• १०० बोटींची व्यवस्था

• आठ किमी अंतरापर्यंत चालणार संचलन

• पॅरिसमधील वेळेनुसार सायंकाळी ७.३० वाजता सुरू होणार उद्घाटन सोहळा

• भारतीय वेळेनुसार रात्री ११.०० वाजता

• थेट प्रक्षेपण ः स्पोर्ट्स १८, जिओ सिनेमा

• पी. व्ही. सिंधू, शरथ कमाल भारताचे ध्वजधारक