तिसऱ्या दिवसाची मोठी अपडेट! Paris Olympics मध्ये सात्विक साईराज व चिराग शेट्टीचा सामना रद्द; मोठे कारण आले समोर

Paris 2024 Olympics : भारताची महिला नेमबाज मनू भाकर हिने रविवारी फ्रान्समधील शूटिंग रेंजवर अचूक लक्ष्य साधून ऐतिहासिक यश संपादन केले. पिस्तूल क्वीन मनू हिने 10 मीटर एअर पिस्तूल प्रकारात ब्राँझपदकावर मोहर उमटवत भारताचे पॅरिस ऑलिंपिकमधील पदकाचे खाते अगदी रुबाबात उघडले.

दरम्यान, आज तिसरा दिवस सुरू होण्याआधी पुरुषांच्या बॅडमिंटनमधून एक मोठी बातमी समोर येत आहे.  सात्विकसाईराज रंकीरेड्डी आणि चिराग शेट्टी यांचा दुपारी होणार सामना रद्द करण्यात आला आहे.

सात्विकसाईराज रंकीरेड्डी आणि चिराग शेट्टी यांचा जर्मनीच्या मार्क लॅम्सफस आणि मार्विन सीडेल यांच्याविरुद्धचा पुरुष दुहेरी गटातील सामना रद्द करण्यात आला आहे. कारण दुखापतीमुळे जर्मन संघाने या सामन्यातून माघार घेतली आहे.

पहिल्या सामना जिंकल्यानंतर सात्विकसाईराज रंकीरेड्डी आणि चिराग शेट्टी या जोडीला आणखी दोन सामने खेळायचे होते, मात्र दुसरा सामना रद्द झाल्यामुळे भारतीय जोडी आता एकच सामना खेळणार आहे.

पदकाच्या आशा जिवंत ठेवण्यासाठी सात्विकसाईराज आणि चिराग यांना शेवटच्या सामन्यात जिंकून पराभवाची भरपाई करावी लागेल. सात्विकसाईराज आणि चिराग ही भारतीय जोडी त्यांचा पुढील आणि शेवटचा सामना मंगळवार, 30 जुलै रोजी इंडोनेशियाच्या अल्फियान फजर आणि अर्दियांतो मुहम्मद रियान यांच्याशी खेळेल.

हॉकीमध्ये हरमनप्रीत सिंग आणि त्याचा संघ अर्जेंटिनाशी भिडणार आहे. भारताने न्यूझीलंडचा 3-2 असा पराभव केला होता. पण भारताला उपांत्यपूर्व फेरी गाठायची असेल तर हा सामना जिंकावा लागेल.