Vinesh Phogat : दुखापतीच कारण सांगून माघार घेतली असती तर विनेश फोगाट जिंकली असती सिल्वर मेडल? जाणून घ्या नियम

Vinesh Phogat Disqualification : पॅरिस ऑलिम्पिकमध्ये मंगळवारी तीन सामने जिंकून अंतिम फेरीत पोहोचलेली भारतीय कुस्तीपटू विनेश फोगाट 100 ग्रॅम जास्त वजनामुळे ऑलिम्पिकसाठी अपात्र ठरली. शेवटच्या क्षणापर्यंत पॅरिसमध्ये उपस्थित असलेल्या भारतीय संघाशी संबंधित अधिकाऱ्यांनी प्रयत्न केले, मात्र विनेशला पदक मिळवता आले नाही.

आपले वजन ५० किलोच्या आत येत नाही, याची जाणीव झाल्यावर विनेश दुखापतीचे कारण सांगून अंतिम फेरीतून माघार घेऊ शकली असती त्यामुळे तिला किमान रौप्यपदक तरी मिळाले असते, असा प्रश्न अनेक जण उपस्थित करत आहे. मात्र, नियमानुसार विनेशला हे करता येत नाही.

जागतिक कुस्ती महासंघाचा नियम काय सांगतो..

- एखादा खेळाडू दुखापतग्रस्त झाला आणि पुढे खेळू शकणार नसेल तर त्याला पुन्हा वजन करण्याची गरज नाही. दुखापतीपूर्वी त्याने मिळवलेले गुण कायम राहतात; पण जर त्या मल्लाला पुढच्या सामन्यात खेळायचे असेल तर जागतिक कुस्ती महासंघाच्या डॉक्टरांकडून तिला किंवा त्यांना तंदुरुस्तीचे प्रमाणपत्र मिळवावे लागते.

- जर पहिल्याच दिवशी दुखापत किंवा आजार झाला तर पुढच्या फेरीत खेळण्यापूर्वी त्या मल्लाला वजन काट्यावर उभे राहावेच लागते. तसे केले नाही तर तो मल्ल अपात्र ठरतो.

- वजनाच्या वेळी केवळ एक युनिफॉर्म परिधान करायला परवानगी असते.

- व्यवस्थित कपडे परिधान केले नसतील तर रेफ्री खेळाडूला वजन करण्यास परवानगी देत नाही.

- पदकाची लढत असेल तर थोड्या ग्रॅम वजनालाही परवानगी नसते.

- अंतिम सामन्याच्या वेळी दोनदा वजन चाचणी होते.